Yevropa Ittifoqi Afg‘oniston muvaqqat hukumati tarkibidan xavotir bildirdi. Ittifoqning Tashqi ishlar xizmati “Tolibon” inklyuziv hukumat tuzish haqidagi va’dasini bajara olmagan, deb hisoblaydi.
“Yevropa Ittifoqi ‘Tolibon’ning 7-sentabr kuni tayinlagan Afg‘oniston muvaqqat hukumatidan xavotirda. Uning tarkibi Afg‘onistonning siyosiy, diniy va etnik xilma-xilligini aks ettiruvchi inklyuziv hukumat tuzish haqida ‘Tolibon’ bergan va’dalarga mos kelmaydi ”, — deyiladi Yevroittifoq xabarida.
Bryusselning fikricha, inklyuziv va vakillik hukumati “barqaror va tinch Afg‘onistonni barpo etishning asosiy elementi”, shuningdek, Yevropa Ittifoqining Afg‘oniston bilan hamkorligining asosiy mezonidir. Yevropa Ittifoqi Afg‘oniston rasmiylarining hukumatni shakllantirish jarayonida inklyuziv va vakillik tamoyillariga amal qilishiga umid qilmoqda.
7-sentabr kuni “Tolibon” harakati Afg‘oniston hukumatining yangi tarkibini e’lon qildi. Harakat matbuot kotibi Zabihulla Mujohid Vazirlar Mahkamasining a’zolari ro‘yxatini ommaga taqdim qilgan, uning o‘zi hukumatda madaniyat va axborot vaziri lavozimini egallaydi.
Qayd etilishicha, Muhammad Hasan Ohund “Tolibon” tuzgan yangi hukumatning rahbari bo‘ladi. Ohund “Tolibon” yetakchilarining rahbari hisoblanardi va avvalgi AQSh homiyligidagi hukumat qo‘shiniga qarshi urushda guruhni boshqargan. Qandahorlik yetakchi “Tolibon” asoschilaridan biri hisoblanadi.
Mulla Abdul G‘ani Barodar bosh vazir o‘rinbosari bo‘ladi, u “Tolibon”ning siyosiy qanotiga rahbarlik qilgan. “Haqqoniy tarmog‘i” guruhi asoschisining o‘g‘li Sirojiddin Haqqoniy esa ichki ishlar vaziri lavozimini egallaydi. “Tolibon” asoschilaridan birining o‘g‘li Umar Yoqub mudofaa vaziri bo‘ladi. U 2020-yildan boshlab “Tolibon”ning deyarli barcha harbiy operatsiyalariga rahbar bo‘lgan.
Shuningdek, “Tolibon” yangi hukumatda ayollar uchun lavozimlar bo‘lishini va’da qildi. “Bizda ayollar uchun shariat qonunlariga muvofiq lavozimlar bo‘ladi. Ular hukumat tarkibida ishlay oladi”, — dedi Mujohid. Uning aniqlik kiritishicha, avvalroq e’lon qilingan hukumat tarkibi (unda ayollar yo‘q) vaqtinchalik.
Izoh (0)