“Tolibon” harakatning nufuzli a’zolarini vazirlik lavozimlariga tayinladi. Bu haqda harakat vakillariga tayanib Reuters xabar berdi.

Foto: Reuters

Agentlikning “Tolibon”dagi ikki manbasi xabar berishicha, harakat o‘z faxriylarini mudofaa vaziri, moliya va ichki ishlar vaziri lavozimlariga tayinlagan, chunki ularning fikricha, jangarilar diqqatini harbiy fathga emas, inqiroz davrida mamlakatni qanday boshqarishga qaratmoqda.

“Tolibon” bu tayinlovlarni rasman e’lon qilmagan, biroq Afg‘onistonning Pajhwok agentligi xabar berishicha, Gul Og‘a moliya vaziri, Sadr Ibrohim esa ichki ishlar vaziri vazifasini bajaruvchi etib tayinlangan.

Al Jazeera telekanali “Tolibon”dagi manbasiga tayanib yozishicha, Guantanamo qamoqxonasining sobiq mahbusi Mulla Abduqayum Zokir mudofaa vaziri vazifasini bajaruvchi etib tayinlangan.

“Tolibon”ning Kobuldagi vakili asosiy vazirlar tayinlanganini tasdiqladi, shuningdek, uning aytishicha, “Tolibon”ning eng tajribali komandirlari orasidan viloyat gubernatorlari tanlab olinadi.

“Tolibon” komandirlaridan biri ham asosiy vazirlik lavozimlariga nomzodlar tanlangani haqidagi xabarlarni tasdiqladi, lekin ular hali rasman ma’qullanmaganini aytdi.

“Kecha kechqurun prezident saroyida uchrashuvlar bo‘lib o‘tdi, biz ushbu masalalarni muhokama qildik, ammo tayinlovlar ma’qullangani e’lon qilingani ham yo‘q”, — dedi u ismini oshkor qilmaslik sharti bilan.

Ekspertlarning so‘zlariga ko‘ra, boshqa muhim lavozimlarga, asosan, janubdagi Helmand va Qandahor viloyatlaridagi “Tolibon” harbiy rahbarlari tayinlangan.

Reuters xabariga ko‘ra, Gul Og‘a aftidan “Tolibon”ning moliyaviy komissiyasi rahbari bo‘lgan. U BMT qo‘mitasining sanksiyalar ro‘yxatiga kiritilgandi. Shuningdek, BMT va Interpolning sanksiyalar haqidagi xabarnomasida u “Tolibon”ning asoschisi, marhum Muhammad Umarning bolalikdagi do‘sti bo‘lgani aytiladi. Bir vaqtlar uning roziligisiz hech kimga mulla Umar bilan uchrashishga ruxsat berilmagan. U “Tolibon” rejimi davrida Umar bilan prezident saroyida yashagan.

Abduqayum Zokir — “Tolibon”ning jangovor harakatlari qatnashchisi, komandir, shuningdek, Umarning yaqin sherigi bo‘lgan.

OAV ma’lumotlariga ko‘ra, 2001-yilda AQSh armiyasi xodimlari Zokirni hibsga olib, Bagram harbiy bazasidagi qamoqxonaga jo‘natgan, keyin u Guantanamo qamoqxonasiga ko‘chirilgan. 2007-yilda uni qo‘yib yuborishdi va Afg‘oniston hukumatiga topshirishdi, jangari esa “Tolibon” tarafida kurashni davom ettirdi. Taxminlarga ko‘ra, shu yilning avgust oyida “Tolibon” qo‘shinlari Kobulga kirib, prezident saroyini egallagan paytda ularni aynan Zokir boshqargan.

Ichki ishlar vaziri etib tayinlangan Sadr Ibrohim ham “Tolibon”ning asosiy a’zosi. Agentlikning ta’kidlashicha, “Tolibon” o‘z vakillarini tayinlashda Moliya vazirligi va Markaziy bankdagi o‘rta darajali amaldorlarga o‘z vazifalariga qaytishni buyurgan.

Avvalroq “Tolibon” rahbarlari Afg‘onistonni boshqarish uchun 12 kishidan iborat kengash tuzmoqchi ekani xabar qilingandi.

“Tolibon” Afg‘onistonda prezident yoki boshqa yagona rahbar lavozimini qayta tiklashni istamaydi, lekin shu bilan birga, ular avvalgi hukumat a’zolariga yangi kengashdan o‘rin taklif qilishni rejalashtirmoqda. Shu tarzda “Tolibon” xalqaro hamjamiyat e’tirofiga sazovor bo‘lish imkoniyatini oshirish uchun iloji boricha inklyuziv ko‘rinadigan boshqaruv organini yaratmoqchi, deb yozadi Foreign Policy.