Ukraina prezidenti Rossiya bilan urush ehtimoli borligini tan oldi

Ukraina prezidenti Vladimir Zelenskiyning aytishicha, Rossiya bilan urush ehtimoli bor, lekin shunday bo‘lgan taqdirda, bu Moskvaning “eng katta xatosi” bo‘ladi. Bu haqda siyosatchi YES Brainstorming forumida gapirib o‘tdi.

“Menimcha, mumkin… Bunday bo‘lishi mumkinligi nihoyatda yomon, lekin, afsuski, bunday ehtimol bor”, — deb javob berdi Zelenskiy Rossiya bilan keng ko‘lamli urush ehtimoli bor-yo‘qligi haqidagi savolga.

Zelenskiyning so‘zlariga ko‘ra, 2014-yilda Moskva bu yo‘nalishda “oldinga qadam” tashlagan, biroq ukrainaliklar vaziyatning noxush rivojlanishini to‘xtatishga muvaffaq bo‘lgan. Prezidentning qo‘shimcha qilishicha, agar Rossiya tomonidan “kuchli eskalatsiya” yuz bersa, “Rossiya, Ukraina, Belarus o‘rtasida hech qachon qo‘shnichilik bo‘lmaydi”.

Aprel oyida Ukraina prezidenti matbuot kotibi Yuliya Mendel Kiyev Donbassga hujum uyushtirmoqchi emasligini aytgandi. “Ukraina o‘z hududiga hujum qila olmaydi, o‘z xalqi bilan jang qila olmaydi”, — degan edi u. Keyinroq Ukraina prezidenti devoni rahbarining maslahatchisi Aleksey Arestovich, Rossiyaning hujumiga javoban, Kiyevning “boshqa chorasi qolmaganda”, Ukraina mintaqada hujumga o‘tishini aytgan.

Rossiya tashqi ishlar vaziri Sergey Lavrovning fikricha, Donbassda Ukraina bilan urushdan qochish kerak. “Agar bu bizga va mintaqadagi posbonlarga bog‘liq bo‘lsa, ularning prinsipial yondashuvlarini tushunishimiz mumkin bo‘lsa, urushdan qochish mumkin va shunday qilish kerak ham”, — dedi u.

Tashqi ishlar vazirining ta’kidlashicha, u Ukraina tomonining xatti-harakatlariga kafolat bera olmaydi, chunki Zelenskiy uchun asosiy narsa — har qanday holatda ham hokimiyatda qolish.

“U har qanday narxni to‘lashga tayyor, shu jumladan, Donbass jangarilarini terrorchi deb e’lon qilishda davom etayotgan neonatsistlar va o‘ta radikallarga yon berishga ham”, — deya qo‘shimcha qildi Lavrov.

Avvalroq Ukraina prezidenti kiberqo‘shin tuzishni buyurgani haqida xabar berilgandi. Bundan tashqari, prezident hukumatga kiberqo‘shinlarni yaratish va ularning to‘g‘ri ishlashini ta’minlash uchun zarur bo‘lgan moddiy, texnik va moliyaviy resurslar miqdorini hisoblab chiqishni buyurdi.