Дания коронавирусга қарши чекловларни бутунлай бекор қилган биринчи Европа давлати бўлди. Мамлакатда COVID-19 инфекциясини ўта хавфли касаллик деб белгиловчи низомнинг амал қилиш муддати бугун, 10 сентябрдан тугайди. Бу ҳақда Politico нашри хабар берди.
Ушбу низомнинг бекор қилиниши билан бирга, чекловларни босқичма-босқич олиб ташлаш тўғрисидаги келишув ҳам амал қилишдан тўхтайди. Келишувга кўра, мамлакатда қолган барча чеклов чораларига риоя қилиш 1 октябрдан бекор қилиниши керак эди.
Энди бутун мамлакат бўйлаб ресторанларга, спорт залларига ва тунги клубларга кириш учун рухсатнома талаб қилинмайди, болалар COVID-19 билан касалланган одам билан мулоқотда бўлганидан кейин дарҳол уйга юборилмайди. Карантин фақат коронавирусга чалинганлар учун амал қилади. Соғлом фуқаролар офисларга, болалар эса мактабларга қайтиши мумкин бўлади.
Ҳукуматнинг барча санитария чораларини 10 сентябргача бекор қилиш нияти август ойи охирида маълум бўлди. Дания соғлиқни сақлаш вазирлиги томонидан тегишли бюллетен тарқатилди. Қироллик Соғлиқни сақлаш вазирлиги раҳбари Магнус Хойнике мамлакатда вакцинация даражасини жуда юқори деб баҳолади. У, шунингдек, чекловлар олиб ташланганидан кейин, агар мамлакатда эпидемиологик вазият бирдан ёмонлашса, қайта карантин жорий қилиниши мумкинлигини тан олди.
26 июндан Исландия ҳукумати коронавирусга қарши чекловларнинг барчасини бекор қилганди. Ўша пайтдаги ҳолатга кўра, мамлакатда вояга етган аҳолининг 87 фоизи эмланган.
Шунингдек, ўша куни Испанияда кўчада ниқоб тақиш мажбурияти бекор қилинганди. Испания Соғлиқни сақлаш вазири Каролина Дариаснинг сўзларига кўра, фуқаролар 1,5 метр ижтимоий масофани сақлаш шарти билан очиқ ҳавода ниқоб тақиши шарт эмас. Бироқ савдо кўчалари сингари гавжум жойларда ёки катта тадбирларда ниқобдан фойдаланиш керак бўлади.
Туркияда эса 1 июлдан комендантлик соати тўлиқ бекор қилинган.
Изоҳ (0)