Rossiya prezidenti Vladimir Putin va Belarus prezidenti Aleksandr Lukashenko o‘rtasida taxminan uch yarim soat davom etgan muzokaralar yakunlandi. Putinning aytishicha, ittifoq davlat doirasida integratsiyalashuv bo‘yicha 28 ta hamkorlik dasturining barchasi muvofiqlashtirilgan.
“Bugun men mamnuniyat bilan shuni ta’kidlashni istardimki, barcha 28 ta dastur muvofiqlashtirildi”, — dedi Putin muzokaralar yakunlari bo‘yicha qo‘shma matbuot anjumanida. Vladimir Putinning so‘zlariga ko‘ra, “dasturlar qonunchilikni birlashtirish to‘g‘risida, shuningdek, ikki mamlakat xo‘jalik yurituvchi subyektlari faoliyati shartlarini tenglashtirish, umumiy moliyaviy va energetika bozorlarini, transport maydonini qurish, yagona sanoat va qishloq xo‘jaligi siyosatini shakllantirish va amalga oshirish to‘g‘risida”.
Putinning aytishicha, dasturlar 10-sentabr kuni tasdiqlanadi, shundan keyin bu masala ko‘rib chiqish uchun ittifoq davlati Oliy davlat kengashiga taqdim etiladi. Kengash yig‘ilishi yil oxirigacha o‘tkazilishi kerak.
“Rossiya va Belarus bilvosita soliqlarni yig‘ishning umumiy tamoyillari to‘g‘risida shartnoma imzolash niyatida”, — dedi Vladimir Putin. Ittifoq davlati tarkibida bilvosita soliqlarni boshqarishning yaxlit tizimini joriy etish rejalashtirilmoqda.
“Kelgusida yagona pul-kredit siyosatini shakllantirish, valyutani tartibga solish, milliy to‘lov tizimlarini integratsiyalash va umumiy to‘lov maydonini yaratish bo‘yicha umumiy ko‘rsatmalar aniqlandi”, — deya qo‘shimcha qildi Rossiya prezidenti.
Qayd etilishicha, 2022-yilda Belarus uchun gaz narxi 2021-yil darajasida qoladi. 2023-yil 1-dekabrga qadar “yagona gaz bozorini yaratish to‘g‘risidagi hujjat imzolanadi”. Shuningdek, neft, neft mahsulotlari va elektr energiyasi uchun umumiy bozorlar yaratilishi mumkin.
“Umid qilamizki, ikki mamlakatning oddiy fuqarolari integratsiyadan katta foyda ko‘radi. Ruslar va belaruslarga iqtisodiy va ijtimoiy sohalarda teng huquq va imkoniyatlar kafolatlanadi”, — deya qo‘shimcha qildi Putin.
Aleksandr Lukashenko matbuot anjumanida ikki hukumat “ulkan ishni amalga oshirganini” aytdi. “Bugun Vladimir Vladimirovich bilan biz uchun muhim bo‘lgan fundamental qarorlarni qabul qildik”, — dedi Belarus prezidenti.
Lukashenkoning fikricha, integratsiya dasturlarining mamlakatlar xalqi uchun yomon tomoni yo‘q. “Muxolifatchi deb ataladiganlar (Belarusda) meni va hokimiyatni tanqid qilib, shovqin ko‘tardi... Shuning uchun men ulardan va Rossiya bilan integratsiyamizni tanqid qiluvchilardan so‘ramoqchiman — siz qayerda Rossiya Federatsiyasining oyog‘ida og‘irlik ko‘ryapsiz? ”, — dedi Lukashenko.
Belarus prezidenti Aleksandr Lukashenko 9-sentabr kuni ishchi tashrif bilan Moskvaga kelgandi. U Putin bilan Rossiya va Belarus birlashuvi rejasini tasdiqlamoqchi ekani xabar qilingandi.
Rossiya va Belarus rasmiylari 1999-yildan beri ikki davlatning siyosiy integratsiyasini muhokama qilib keladi. 2019—2020-yillarda iqtisodiyot va boshqaruvning turli sohalarida birlashuvni o‘z ichiga olgan 31 ta yo‘l xaritasi atrofida muzokaralar o‘tkazilgan. Yo‘l xaritalari loyihalari biror marta chop etilmagan. Avvalroq Belarus aholisi mamlakatning Rossiya bilan integratsiyasiga qarshi chiqqan edi.
Izoh (0)