Ispaniyada koronavirus pandemiyasi sababli joriy qilingan ko‘chada himoya niqoblarini taqish majburiyati 26-iyundan bekor qilindi, deb yozadi “RBK”.

Mamlakat bosh vaziri Pedro Sanches o‘tgan hafta epidemiologik choralarni yumshatish to‘g‘risidagi qarorni e’lon qildi. Ushbu qaror Ispaniya Vazirlar Mahkamasi va Sog‘liqni saqlash vazirligi tomonidan tasdiqlandi.

Sog‘liqni saqlash vaziri Karolina Dariasning so‘zlariga ko‘ra, fuqarolar 1,5 metr ijtimoiy masofani saqlash sharti bilan ochiq havoda niqob taqishi shart emas. Biroq savdo ko‘chalari singari gavjum joylarda yoki katta tadbirlarda niqobdan foydalanish kerak bo‘ladi.

Shu bilan birga, barcha yopiq jamoat joylarida, jumladan, do‘konlar, kinoteatrlar, teatrlar, kutubxonalar va muzeylarda niqob taqish majburiy bo‘lib qolmoqda. Bu qoida jamoat transportida ham amal qiladi.

The Local nashrining ta’kidlashicha, ko‘chada niqob taqish majburiyati butun Ispaniya bo‘ylab bekor qilingan bo‘lsa-da, hududlar vaziyatga qarab o‘zlari qaror qilishi mumkin. Masalan, Andaluziya va Asturiya hukumati ochiq havoda ham niqob taqishni davom ettirishni tavsiya qildi.

Ispaniya hukumati fuqarolarga 2020-yil bahorida jamoat joylarida niqob taqishni buyurgandi. 2021-yil mart oyida odamlar orasidagi masofadan qat’i nazar, ko‘chada himoya niqoblarini taqish talabi kuchaytirildi.

Jons Hopkins universiteti ma’lumotlariga ko‘ra, Ispaniyada pandemiya boshidan beri 3,7 million kishi COVID-19’ga chalingan, shulardan 80,7 ming kishi kasallikdan vafot etgan. The Local nashrining yozishicha, iyun oyi o‘rtalariga kelib, mamlakat aholisining 47 foizi koronavirusga qarshi vaksinaning kamida bitta komponenti bilan emlangan. Nashrning ta’kidlashicha, hozir mamlakatda kasallanish darajasi 2020-yilning avgustidan buyon eng past ko‘rsatkichda.