Turkiya prezidenti Rajab Toyyib Erdo‘g‘on mamlakatda 1-iyundan koronavirus fonida qo‘yilgan cheklovlarning bir qismi bekor qilinishini e’lon qildi, deb yozadi “RBK”.

“1-iyuldan boshlab komendantlik soatini butunlay bekor qilamiz”, — dedi Erdo‘g‘on.

Bundan tashqari, shaharlararo harakatlanish va shahar jamoat transportidan foydalanishga qo‘yilgan cheklovlar bekor qilinadi.

Erdo‘g‘onning ta’kidlashicha, vaksinatsiya mamlakat uchun asosiy maqsad bo‘lib qolmoqda. Uning so‘zlariga ko‘ra, Turkiyada 43 milliondan ortiq dozada koronavirusga qarshi vaksinalar ishlatilgan. Davlat rahbari bir necha hafta ichida 18 yoshdan kattalarni emlashni yakunlash niyatida ekanini e’lon qildi.

Turkiya Sog‘liqni saqlash vazirligining ma’lumotlariga ko‘ra, o‘tgan kun davomida mamlakatda COVID-19’ga chalinish bo‘yicha 5,2 mingta yangi holat qayd etildi, 51 kishi kasallikdan vafot etdi.

Aprel oyi o‘rtalarida Turkiya hukumati COVID-19’ga chalinish holatining ortishi munosabati bilan cheklov choralarini kuchaytirdi. Mamlakatda komendantlik soati davomiyligi soat 19:00 dan 05:00 gacha uzaytirildi. May oyida Turkiyada yangi chora-tadbirlar kuchga kirdi, unga ko‘ra, do‘konlarda faqat asosiy oziq-ovqat va gigiyena mahsulotlarini sotishga ruxsat berildi.

17-maydan mamlakatdagi karantin rejimi bosqichma-bosqich yumshatila boshladi. Xususan, 1-iyundan komendantlik soati qisqartirilib, to‘ylarga ruxsat berildi.