Kanada bosh vaziri Jastin Tryudo namoyishchilar tomonidan toshbo‘ron qilindi. Voqea bosh vazir po‘lat zavodidagi mitingdan chiqib, avtobus tomonga ketayotgan paytda sodir bo‘lgan. Tryudo CBC telekanaliga bergan intervyusida unga shag‘al tegganini, lekin o‘zini yaxshi his qilayotganini aytdi.
Kanada Liberal partiyasining rahbari Tryudo zavoddagi mitingda bo‘lajak parlament saylovlari dasturi haqida gapirgan.
CTV News xabariga ko‘ra, Tryudoga shag‘al otganlar orasida aholini majburiy emlashga qarshi konservativ harakat — Kanada Xalq partiyasining tarafdorlari ko‘p bo‘lgan.
O‘z nutqidan so‘ng Tryudo uning siyosati emlashga qarshi muxolifatchilarning talabi bilan belgilanmasligini aytdi.
“Ha, mamlakatda g‘azablangan, ilmga ishonmaydigan, irqchilik va misoginistik hujumlar uyushtiruvchi odamlarning ma’lum qismi bor”, — dedi bosh vazir. Shu bilan birga, u bunday toifadagi odamlar Kanada aholisining ko‘pchiligini tashkil qilmasligiga ishonch bildirdi.
“Shuni ham bilamanki, men bu ovozlarning, bu maxsus manfaat guruhlarining, bu namoyishchilarning — hatto ularni namoyishchilar deb aytishni ham istamayman — ushbu vaksinatsiyaga qarshi to‘dalarning mamlakat pandemiyadan qanday omon qolishini belgilab berishiga yo‘l qo‘ymayman”, — deb qo‘shimcha qildi Tryudo.
20-sentabr kuni Kanadada parlament saylovlari bo‘lib o‘tadi. Hozir Jamoat palatasida ko‘pchilik — 338 tadan 155 ta o‘rinni Liberallar partiyasi egallab turibdi. Undan keyin 119 ta o‘rin bilan konservatorlar bormoqda.
Avvalroq Tryudo korxona va fuqarolar himoyasi uchun COVID-19 ga qarshi majburiy emlashni joriy etishga va’da bergandi. Xususan, bosh vazir tadbirkorlarga koronavirusga qarshi vaksina olmagan ishchilarni ishdan bo‘shatish huquqini bermoqchi.
Izoh (0)