Hindistonning Kerala shtatida yashovchi 11 kishida o‘limga olib keluvchi Nipah virusi simptomlari topildi, ularning ahvoli barqaror. Bu haqda shtat sog‘liqni saqlash vaziri Vina Jorjga tayanib, “Interfaks” xabar berdi.
Hindiston tibbiyot fanlari instituti tibbiyot fakulteti professori Ashutosh Bisvasning so‘zlariga ko‘ra, mevaxo‘r ko‘rshapalaklar ushbu virusning tashuvchisi hisoblanadi. Virus respiratorli simptomlar bilan bir qatorda isitma, mushaklar og‘rig‘i, bosh og‘rig‘i, bosh aylanishi va ko‘ngil aynishiga olib kelishi mumkin.
“Mevaxo‘r ko‘rshapalaklar ma’lum bir geografik hududda yashaydi. Agar ular boshqa joylarga uchib o‘tsa, tabiiyki, virus ham tarqalishi mumkin. Bizda bu kasallik uchun muayyan davo yo‘q”, — dedi u. Bisvasning aytishicha, virus odamdan odamga tez tarqaladi.
“Undan oldin bizda Nipah virusi ikki marta avj olgan: birinchi safar Keralada, ikkinchi safar G‘arbiy Bengaliyada. So‘nggi epidemiya chog‘ida kasallangan bemorlarning 90 foizga yaqini vafot etgandi”, — deydi Bisvas.
Uning qo‘shimcha qilishicha, bu muammo global bo‘lib, Hindiston yaqinidagi boshqa bir qator mamlakatlarda, masalan, Bangladeshda virusning qayta tarqalishi kuzatilgan.
Kerala hukumati bundan oldin Kerala shtati Kojikod shahrida 12 yoshli bola Nipah virusidan vafot etgani haqida xabar bergandi. U yerga tibbiy guruh yuborilgan, ular bolaning uyiga tashrif buyurib, infeksiya manbasini aniqlash uchun yaqin atrofdagi rambutan mevalaridan namunalar yig‘gan.
Eslatib o‘tamiz, 2021-yil yanvarida Jahon sog‘liqni saqlash tashkiloti (JSST) 1999-yilda Malayziyada aniqlangan Nipah virusi sababli yuzaga kelishi mumkin bo‘lgan pandemiya xavfi haqida ogohlantirgan edi.
Izoh (0)