Eron prezidenti yadro bitimi bo‘yicha muzokaralarga tayyorligini bildirdi

Eron prezidenti Ibrohim Raisiy 2015-yilda tuzilgan yadro bitimini yangilash borasida jahonning yetakchi davlatlari bilan muzokara o‘tkazish uchun o‘z shartlarini ma’lum qildi, deb yozadi Reuters.

Agentlikning ta’kidlashicha, Fransiya va Germaniya Eronni iyun oyida mamlakatda bo‘lib o‘tgan prezidentlik saylovlaridan so‘ng muzokaralarga qaytishga undagan. Shu bilan birga, Tehronning yadroviy faoliyati kengayib borayotgani yuzasidan G‘arbning xavotir bildirishi fonida Parij zudlik bilan bitimni qayta tiklashni talab qilgan.

O‘tgan oy Fransiya, Germaniya va Buyuk Britaniya Birlashgan Millatlar Tashkiloti tarkibidagi Yadroviy xavfsizlik boshqarmasining (MAGATE) Eron to‘g‘risidagi hisobotlaridan xavotir bildirgan. Hisobotda aytilishicha, Eron birinchi bo‘lib parchalanadigan toza uran metallini 20 foizgacha boyitilgan holda ishlab chiqardi, shuningdek uranni 60 foizga boyitish bilan ishlab chiqarish quvvatini oshirdi.

O‘z navbatida, Eron mamlakatning yadroviy dasturi tinch xususiyatga ega ekanini aytdi va kuzatuvchi organga o‘z faoliyati to‘g‘risida xabar berdi. Shuningdek, ta’kidlanishicha, agar AQSh o‘z sanksiyalaridan voz kechsa, Eronning 2015-yilgi yadro kelishuvidan chiqishi ham bekor qilinadi.

“G‘arb siyosatchilari va amerikaliklar muzokaralarni bosim bilan olib bormoqda. Men esa hukumatimiz bosim bilan emas, kun tartibi bo‘yicha muzokara olib borishini e’lon qilganman. Bu muzokaralarda biz adolatsiz sanksiyalarning bekor qilinishiga erishishga intilmoqdamiz”, — dedi Raisiy davlat televideniyesi efirida.

Eronning yangi prezidenti Ibrohim Raisiy 5-avgust kuni rasman lavozimiga kirishgandi. O‘sha kuni prezident o‘z zimmasiga yuklangan barcha majburiyatlarni bajarish uchun bor imkoniyatlarini ishga solishga qasamyod qildi.