Жиззахда қўл остидаги 33 нафар фаррош ва ҳамшира номига кредит расмийлаштириб, фирибгарлик қилган катта ҳамшира қўлга олинди

Жиззах вилояти Ғаллаорол тумани тиббиёт бирлашмаси жонлантириш бўлими катта ҳамширасига фирибгарлик юзасидан жиноят иши қўзғатилиб, қўлга олинди. Бу ҳақда вилоят ИИБ матбуот хизмати хабар берди.

Маълум бўлишича, у ўз хизмат мавқейидан фойдаланган ҳолда, 2017–2020 йиллар давомида шу бўлимда унга бевосита бўйсунувчи ҳамшира ва фаррошларнинг ишлаб, олаётган маошидан унумли фойдаланиш кераклигини айтиб, уларнинг ишонувчанлигидан фойдаланиб, банкдан улар номига кредит расмийлаштирган.

Айримларига расмийлаштирилган кредит маблағларига кафил сифатида иштирок этишини, ушбу таклифига рози бўлса, навбатчилик кунларига қўшимча маош, байрам кунлари эса рағбатлар чиқариб беришини, кредит тўловларини ўзи тўлашини, ҳеч қандай муаммо бўлмаслигини, ҳужжатга имзо қўйиб берса, шунинг ўзи етишини айтган.

Шу тарзда ёлғон ваъдалар бериб, 33 нафар ҳамшира ва фаррошнинг номига жами 695 миллион 140 минг сўм кредит маблағи расмийлаштирган.

Кейинчалик қолган кредит маблағларини тўлолмаслигини айтган. Бунинг натижасида қарздорлик суд ва мажбурий ижро орқали жабрланувчилардан ундирилиб, уларнинг ойлик даромадидан ушлаб қолинган.

Мазкур ҳолат юзасидан Жиноят кодексининг 168-моддаси 4-қисми «а» банди (жуда кўп миқдорда фирибгарлик) билан жиноят иши қўзғатилиб, катта ҳамширага қамоққа олиш тарзидаги эҳтиёт чораси қўлланган.