Buxoroda shifoxonaga ishga kiritib qo‘yish evaziga fuqarodan 500 dollar so‘ragan shaxs qo‘lga olindi

Buxoro shahar aholi bandlikka ko‘maklashish markazi inspektori firibgarlik ustida qo‘lga olindi, deya xabar bermoqda viloyat IIB axborot xizmati.

Ma’lum qilinishicha, xavfsiz hudud keng qamrovli profilaktik tadbirlari doirasida huquqni muhofaza qiluvchi idoralar xodimlari tomonidan tezkor tadbir o‘tkazilgan.

Unda Buxoro shahar aholi bandlikka ko‘maklashish markazida hududlarni kompleks rivojlantirish bo‘yicha sektorlarga biriktirilgan ishga joylashtirish inspektori, Buxoro shahar G‘ijduvon ko‘chasida yashovchi, 1985-yilda tug‘ilgan M.A. ismli shaxs xizmat mavqeyidan foydalanib, ishsiz fuqaro Sh.D. ismli ayolni Respublika shoshilinch tez yordam ilmiy markazi Buxoro filialiga 1 hissa kichik tibbiyot xodimi vazifasiga ishga joylashtirishni va’da qilib, Buxoro shahar hokimligi binosi oldida 500 AQSh dollarini olayotgan vaqtda ushlangan.

Mazkur holat yuzasidan M.A.ga nisbatan Jinoyat kodeksining 168-moddasi (firibgarlik) 3-qismi bilan jinoyat ishi qo‘zg‘atilib, dastlabki tergov harakatlari olib borilmoqda.

Bundan avval Buxoroda tibbiyot kollejiga 400 dollar evaziga o‘qishga kiritishni va’da qilgan shaxs ushlangani, Farg‘onada fuqaroga 10 sotix yerni 5500 dollarga olib berishni va’da qilgan shaxs ushlangani hamda Qashqadaryoda firibgarlik jinoyatini sodir etib, javobgarlikdan qochib yurgan kosonlik fuqaro Dehqonobodda qo‘lga olingani haqida xabar berilgandi.