Samarqand viloyatining Bulung‘ur tumanida Jinoyat kodeksining 168-moddasi 3-qismi “b” bandi (firibgarlik) bilan aybdor deb topilgan shifokor shu kodeksning 70-moddasi (shaxsning ijtimoiy xavflilik xususiyatini yo‘qotishi munosabati bilan uni jazodan ozod qilish)ga asosan jazodan ozod qilindi. Bu haqda “Daryo”ga Jinoyat ishlari bo‘yicha Bulung‘ur tuman sudi raisi G‘ayrat Negmatov ma’lum qildi.
Sud hujjatlarida qayd etilishicha, Bulung‘ur tuman tibbiyot birlashmasining qon quyish bo‘limi vrachi lavozimida ishlab kelgan N.Ya. tuman tibbiyot birlashmasiga homiladorlik holatida tug‘ruq jarayonini amalga oshirish maqsadida murojaat qilgan Z.M.ning yaqinlaridan bemorga kesarcha kesish yo‘li bilan homilasini olish operatsiyasiga ishlatiladigan qon uchun pul so‘ragan. Z.M.dan 450 ming so‘mni qonunga xilof ravishda olib, o‘zining shaxsiy manfaatlari uchun ishlatib yuborgan.
Bundan tashqari, shifokor jinoiy harakatlarini davom ettirib, tuman tibbiyot birlashmasiga homiladorlik holatida tug‘ruq jarayonini amalga oshirish maqsadida murojaat qilgan B.B.ning kesarcha kesish yo‘li bilan homilasini olish operatsiyasiga shifokorlar tomonidan zaxiradagi qon ishlatilganligini bilib, fuqaro B.B.ning turmush o‘rtog‘i U.T.dan pul talab qilgan.
Shifokor N.Ya. U.T.ga qo‘ng‘iroq qilib, bemorga quyilgan qon o‘rnini qoplash uchun qon topshirishini yoki qon olib kelish uchun 300 ming so‘m pul olib kelishini tayinlagan. Biroq U.T. aytilgan vaqtda kelmagan. Shundan keyin yana unga qo‘ng‘iroq qilib, bir necha marta qon uchun pul olib kelishini aytib, savdolashib, turmush o‘rtog‘iga ishlatilgan qon uchun 250 ming so‘m pul berishiga kelishgan.
Iqtisodiy jinoyatlarga qarshi kurashish departamentining Bulung‘ur tuman bo‘limi xodimlari tomonidan olib borilgan tadbirda shifokor operatsiyada quyilgan qon uchun 100 ming so‘m olayotgan paytga qo‘lga olingan.
Jinoyat kodeksining 168-moddasi (firibgarlik) 3-qismi “b” bandida nazarda tutilgan jinoyatlarni sodir qilganlikda aybdor deb topilgan shifokor shu kodeksning 70-moddasi (shaxsning ijtimoiy xavflilik xususiyatini yo‘qotishi munosabati bilan uni jazodan ozod qilish)ga asosan jazodan ozod qilingan.
Izoh (0)