Qashqadaryo viloyatining Kitob tumanidagi Taxtaqoracha dovonida 2021-yilning 6—7-sentabr kunlari vaqti-vaqti bilan yo‘l yopib qo‘yilishi ma’lum qilindi. Bu haqda “Daryo”ga viloyat Favqulodda vaziyatlar boshqarmasi axborot xizmati rahbari Sohib Vaitov xabar berdi.
Qayd etilishicha, shu kunlari Kitob tumani hududidan o‘tuvchi M-39 Olmaota—Bishkek—Toshkent—Shahrisabz—Termiz xalqaro avtomobil yo‘lining 1135—1146-kilometridagi Taxtaqoracha dovonida viloyat Favqulodda vaziyatlar boshqarmasi tomonidan maxsus taktik o‘quv mashqi o‘tkaziladi.“O‘quv mashqi rejasiga ko‘ra, ushbu avtomobil yo‘lida fuqarolar va transport vositalarining xavfsiz harakatlanishini ta’minlash maqsadida yo‘l atrofidagi ko‘chki va tosh qulashi xavfi mavjud bo‘lgan hududlarda tegishli muhandis-texnik tadbirlar amalga oshirilishi belgilangan. Shu munosabat bilan mazkur avtomobil yo‘lida vaqti-vaqti bilan fuqarolar va avtotransport vositalarining harakatlanishi qisqa muddatga cheklanadi”, — deydi Sohib Vaitov.
Mas’ulning aniqlik kiritishicha, 6—7-sentabr kunlari kuniga ikki yoki uch marotaba, 30 daqiqadan 40 daqiqagacha yo‘l yopilib, qatnov to‘xtatiladi.
Izoh (0)