Britaniya shahzodasi Uilyam o‘zi taniydigan afg‘onistonlik ofitserni oilasi bilan Kobuldan evakuatsiya qilish ishlariga shaxsan aralashdi. Bu haqda Evening Standart nashri xabar berdi.
Nashrning yozishicha, Kembrij gersogi afg‘onistonlik ofitser bilan Sandxerstdagi qirollik harbiy akademiyasida o‘qib yurgan paytlarida tanishgan. Shahzoda sobiq kursantning “Tolibon” Afg‘onistonni o‘z qo‘liga olgani sababli oila a’zolarini mamlakatdan olib chiqishga urinayotganidan xabar topgan.
Shahzoda saroy nomidan ish olib borayotgan qirollik dengiz floti ofitseri Rob Diksondan sobiq hamkasbining mamlakatni tark etishiga yordam berishini so‘ragan. Dikson Kobulda kerakli odamlar bilan aloqa o‘rnatishga muvaffaq bo‘lgan, ular esa afg‘onistonlik va uning oilasini Buyuk Britaniyaga uchadigan bortga olib kelgan.
Afg‘onistonda xizmat qilgan sobiq desantchi mayor Endryu Foks gersogning xatti-harakatlarini yuqori baholadi va Sandxerst orqali tanish afg‘onlarning mamlakatni tark etishiga yordam bergan ofitserlar haqida ko‘plab hikoyalar eshitganini aytdi.
“Bu armiyada o‘rgatilgan qadriyatlar, sodiqlik va boshqalarga hurmat saboqlariga to‘liq mos keladi. Bizga qo‘limizdan kelganicha yordam berish o‘rgatilgan”, — dedi u.
Shuningdek, Buyuk Britaniyaning Afg‘onistondagi elchisi Lori Bristou “Tolibon” hokimiyatni qo‘lga kiritgandan keyin mamlakatni tark etishi kerak edi, lekin u britaniyaliklarga va Britaniya hukumati bilan aloqasi bor afg‘onlarga yordam berish uchun qolgan. 15-avgust kuni Bristou Britaniya elchixonasi ko‘chirib kelingan Kobul aeroportida afg‘onlarga shaxsan o‘zi viza bergan.
Avvalroq Buyuk Britaniya Afg‘onistondan evakuatsiya qilingan afg‘onlarga o‘z hududida doimiy yashash huquqini berishi haqida xabar qilingandi.
Izoh (0)