Шаҳзода Уильям афғонистонлик офицер ва унинг оиласини Кобулдан эвакуация қилишга шахсан ёрдам берди

Британия шаҳзодаси Уильям ўзи танийдиган афғонистонлик офицерни оиласи билан Кобулдан эвакуация қилиш ишларига шахсан аралашди. Бу ҳақда Evening Standard нашри хабар берди.

Нашрнинг ёзишича, Кембриж герцоги афғонистонлик офицер билан Сандхерстдаги қироллик ҳарбий академиясида ўқиб юрган пайтларида танишган. Шаҳзода собиқ курсантнинг «Толибон» Афғонистонни ўз қўлига олгани сабабли оила аъзоларини мамлакатдан олиб чиқишга уринаётганидан хабар топган.

Шаҳзода сарой номидан иш олиб бораётган қироллик денгиз флоти офицери Роб Диксондан собиқ ҳамкасбининг мамлакатни тарк этишига ёрдам беришини сўраган. Диксон Кобулда керакли одамлар билан алоқа ўрнатишга муваффақ бўлган, улар эса афғонистонлик ва унинг оиласини Буюк Британияга учадиган бортга олиб келган.

Афғонистонда хизмат қилган собиқ десантчи майор Эндрю Фокс герцогнинг хатти-ҳаракатларини юқори баҳолади ва Сандхерст орқали таниш афғонларнинг мамлакатни тарк этишига ёрдам берган офицерлар ҳақида кўплаб ҳикоялар эшитганини айтди.

«Бу армияда ўргатилган қадриятлар, содиқлик ва бошқаларга ҳурмат сабоқларига тўлиқ мос келади. Бизга қўлимиздан келганича ёрдам бериш ўргатилган», — деди у.

Шунингдек, Буюк Британиянинг Афғонистондаги элчиси Лори Бристоу «Толибон» ҳокимиятни қўлга киритгандан кейин мамлакатни тарк этиши керак эди, лекин у британияликларга ва Британия ҳукумати билан алоқаси бор афғонларга ёрдам бериш учун қолган. 15 август куни Бристоу Британия элчихонаси кўчириб келинган Кобул аэропортида афғонларга шахсан ўзи виза берган.

Аввалроқ Буюк Британия Афғонистондан эвакуация қилинган афғонларга ўз ҳудудида доимий яшаш ҳуқуқини бериши ҳақида хабар қилинганди.