AQShga evakuatsiya qilingan yuzga yaqin afg‘onlarning terrorchi guruhlar bilan aloqasi bo‘lishi mumkin. Bu haqda NBC ikki manbaga tayanib xabar berdi.
Manbalarga ko‘ra, Afg‘onistondan AQShga olib ketilgan 30 mingdan ortiq odamning 10 mingga yaqinini qo‘shimcha tekshiruvlardan o‘tkazish kerak, ularning 100 ga yaqini terrorchilar bilan aloqada bo‘lishi mumkin.
Kamida ikki afg‘on AQShdan Kosovoga olib ketiladi, chunki ular xavfsizlik xizmatlarini tashvishga solgan. Kosovoda ular qo‘shimcha tekshiruvlardan o‘tadi. Shu bilan birga, telekanal suhbatdoshlarining ta’kidlashicha, agar kimgadir “qizil belgi” berilgan bo‘lsa, bu uning terrorchi ekanini va boshqalarga tahdid solishini anglatmaydi. Bu shuni bildiradiki, yangi kelganlarning shaxsiy ma’lumotidagi biror narsa — ularning ismi, tarjimai holi yoki telefon raqami xavotir uyg‘otgan. Shu sababli qo‘shimcha tekshiruvdan o‘tmaguncha ularning AQShda qolishiga yo‘l qo‘yilmaydi.
AQSh Afg‘onistondan amerikaliklar va NATO fuqarolarini, shuningdek, Amerika harbiylari bilan ishlagan, jumladan, tarjimonlik qilgan afg‘onlarni evakuatsiya qildi. 31-avgust kuni AQSh prezident Jo Baydenning ma’lum qilishicha, ikki haftadan ko‘proq vaqt ichida Vashington Afg‘onistondan 120 mingdan ortiq odamni evakuatsiya qilgan.
Shu bilan birga 31-avgust kuni AQSh Afg‘onistondan o‘z qo‘shinlarini olib chiqishni yakunladi. AQShning Afg‘onistondagi harbiy missiyasi qariyb 19 yil-u 11 oy davom etdi. Amerika qo‘shinlari mamlakatga 2001-yil 11-sentabrda Nyu-York va Vashingtonda teraktlar uyushtirgan “Al-Qoida” bilan kurashish uchun kelgan edi. Bu AQSh tarixidagi eng uzoq davom etgan urush bo‘ldi. Unda 2400 dan ortiq Amerika harbiy xizmatchilari halok bo‘ldi, yana 20 mingdan ortig‘i yaralandi. Ushbu missiya AQShga 1-2 trillion dollarga tushgan. Qo‘shinlarni olib chiqish yakunlangach, AQSh prezidenti Jo Bayden Amerika xalqiga murojaat qilib, nutq so‘zladi.
Amerika harbiylari mamlakatni tark etgach, “Tolibon” harakati Afg‘onistonning to‘liq mustaqillikka erishganini e’lon qildi.
Izoh (0)