Farg‘ona viloyati Bag‘dod tumani “Paxtaobod” mahallasida yashovchi Isaqjon Umrdinov qatnov yo‘lidagi chorrahaga svetofor o‘rnatish tashabbusi bilan chiqdi. Bu haqda tuman hokimligi matbuot xizmati xabar berdi.
“Isaqjon ukamiz — mirishkor bog‘bon, ‘Isaqjon mirob bog‘i’ nomli bog‘dorchilik fermer xo‘jaligi rahbari. Bir necha yildan beri muborak Haj ziyoratiga borishni niyat qilib yuribdi. Tunovda bir xayrli tashabbusni ilgari surib qoldi: qishlog‘imizdan o‘tgan avtomobil yo‘li juda serqatnov, shu chorrahaga svetofor o‘rnatilsa-yu, men shunga homiy bo‘lsam, deb. To‘g‘risi, butun paxtaobodliklar bu ezgu ishdan sevindi. Saxovatpesha boylar ko‘paysin, deb duo qilyapti xalqimiz”, — deydi mahalla raisi Vahobjon Ziyayev.
Ta’kidlanishicha, mazkur chorraha chindan ham tiqilinch: bir tomonda “Mulla A’lam” masjidi, narigi tomonda esa 2 ta maktab joylashgan. Aholiga chorrahadan o‘tish juda qiyinchilik tug‘diradi. Svetofor o‘rnatish ishlari 3-sentabrda boshlangan.
Eslatib o‘tamiz, 2020-yilda surxondaryolik oila Haj ziyorati uchun yig‘gan puliga mahalla uchun yangi transformator o‘rnatib bergandi.
Izoh (0)