3-sentabr kuni Turkmanistonning Lebap viloyatida quvvati 432 megavatt bo‘lgan gaz turbinali elektrostansiya foydalanishga topshirildi, deb xabar beradi Turkmenportal.
Ma’lum qilinishicha, bu Markaziy Osiyo mamlakatlari, jumladan, Afg‘oniston, O‘zbekiston va Qirg‘izistonga elektr energiyasini yetkazish hajmini oshirishga xizmat qiladi.
Obyektning ochilish marosimida Turkmaniston bosh vaziri o‘rinbosari Chorurot Purchekov va Yaponiyaning iqtisodiyot, savdo va sanoat vaziri Kiyosi Edzima ishtirok etgan. Loyiha Turkmaniston Energetika vazirligining “Turkmanenergo” davlat korporatsiyasi tomonidan xorijiy hamkorlar — Sumitomo Corporation va Mitsubishi Power Ltd (Yaponiya), Rönesans Holding (Turkiya) bilan amalga oshirilgan.
Elektrostansiya Yaponiyaning mashhur Mitsubishi Power Ltd gaz turbinalari bilan jihozlangan bo‘lib, bu kabi texnologiya mamlakat elektr energetikasi sohasi tarixida birinchi bor qo‘llanmoqda. U yerda har biri 144 megavatt quvvatga ega uchta gaz turbina generatori o‘rnatilgan.
Bunga qadar Turkmaniston gaz elektrostansiyalari General Electric kompaniyasining turbinalari bilan jihozlanar edi. Bugungi kunda Turkmanistonda ishlayotgan barcha elektrostansiyalarning umumiy quvvati 6511 megavattni tashkil etmoqda. Loyihaga Yaponiyaning xalqaro hamkorlik bo‘yicha banki Turkmaniston Tashqi iqtisodiy banki bilan kredit kelishuvi orqali amalga oshirilyapti.
Eslatib o‘tamiz, 2020-yilning yanvarida nosozlik sababli Turkmanistondan O‘zbekistonga elektr energiyasi yetkazib berish uzilib qolgandi.
Izoh (0)