Buxoroda ayolining pulini o‘marib, uni ko‘ngilxushlik uchun sarflab yuborgan erkakka nisbatan jinoiy ish ochildi. Bu haqda “Markaziy studiya” informatsion dasturi xabar qildi.
Buxoro viloyati Olot tumanida ichkuyov sifatida yashovchi erkak ayoli ishlab topgan 1 million 200 ming so‘m pulni o‘g‘irlab, ularni ko‘chadagi begona ayollarga sarflab yuboradi. Erkak buni yashirish maqsadida uyini tartibsiz holga keltirib, o‘zini o‘zi kaltaklaydi. So‘ngra hovlisiga yotib olib, qo‘shnilarni chaqiradi.
Ayoliga esa uyga o‘g‘ri tushgani va o‘zini kaltaklab, pullarni o‘marib ketganini aytadi. Ayoli bo‘lgan voqea yuzasidan IIBga murojaat qiladi.
Surishtiruv natijasida erkak yolg‘on gapirgani aniqlanadi.
“Uydagilardan so‘roqsiz pul olgandim. Uni qanday aytishni bilmadim-da, qo‘rqqanimdan shunday holat bo‘lganini aytdim. Pushaymonman”, – deydi erkak.
Mazkur holat yuzasidan Jinoyat kodeksining 237-moddasi 2-qismi “a”, “b” va “g” (sun’iy dalillarini vujudga keltirgan holda, g‘arazgo‘ylik niyatlarida va og‘ir yoki o‘ta og‘ir jinoyat sodir etishda ayblab yolg‘on xabar berish) bandlari bilan jinoyat ishi qo‘zg‘atilib, tergov harakatlari olib borilmoqda.
Bu moddaning ushbu bandlari bilan aybdor deb topilgan shaxs 5 yildan 8 yilgacha ozodlikdan mahrum etilishi mumkin.
Mavzuga doir:
- Toshkentda rahbarining 6 mln so‘m pulini totalizatorga tikib, yutqazib qo‘ygan yigit o‘zini pichoqladi
- Toshkentda turmush o‘rtog‘ini yolg‘on bilan uyiga qaytarmoqchi bo‘lgan ayolga jinoyat ishi qo‘zg‘atildi
- Qashqadaryoda talonchilar 32,5 mln so‘m va 700 dollarni tortib olganini aytgan fuqaro yolg‘on ko‘rsatma bergani aniqlandi
Izoh (0)