Фарғона вилояти Бағдод тумани «Пахтаобод» маҳалласида яшовчи Исақжон Умрдинов қатнов йўлидаги чорраҳага светофор ўрнатиш ташаббуси билан чиқди. Бу ҳақда туман ҳокимлиги матбуот хизмати хабар берди.
«Исақжон укамиз — миришкор боғбон, ‘Исақжон мироб боғи’ номли боғдорчилик фермер хўжалиги раҳбари. Бир неча йилдан бери муборак Ҳаж зиёратига боришни ният қилиб юрибди. Туновда бир хайрли ташаббусни илгари суриб қолди: қишлоғимиздан ўтган автомобиль йўли жуда серқатнов, шу чорраҳага светофор ўрнатилса-ю, мен шунга ҳомий бўлсам, деб. Тўғриси, бутун пахтаободликлар бу эзгу ишдан севинди. Саховатпеша бойлар кўпайсин, деб дуо қиляпти халқимиз», — дейди маҳалла раиси Ваҳобжон Зияев.
Таъкидланишича, мазкур чорраҳа чиндан ҳам тиқилинч: бир томонда «Мулла Аълам» масжиди, нариги томонда эса 2 та мактаб жойлашган. Аҳолига чорраҳадан ўтиш жуда қийинчилик туғдиради. Светофор ўрнатиш ишлари 3 сентябрда бошланган.
Эслатиб ўтамиз, 2020 йилда сурхондарёлик оила Ҳаж зиёрати учун йиғган пулига маҳалла учун янги трансформатор ўрнатиб берганди.
Изоҳ (0)