4-sentabr kuni xalq ta’limi vaziri Sherzod Shermatov boshchiligida 2021/2022-o‘quv yili oldidan umumta’lim maktablari direktorlari, o‘qituvchilar va ota-onalar ishtirokida ochiq muloqot o‘tkazildi, deb xabar beradi vazirlik matbuot xizmati.
Muloqot davomida milliy qadriyatlarni inobatga olgan holda, qizlarga istisno tariqasida maktabda oq va ochiq ranglarda milliy ro‘mol (boshning orqa tomoniga o‘ralgan holatda) va do‘ppida bo‘lishlariga ruxsat etilishi ma’lum qilingan.
“Farzandlarimiz ro‘mol o‘rashni xohlasa, o‘zbekcha qilib o‘rasin. Kerak bo‘ladigan bo‘lsa, ko‘ylagining yoqasini ham sal yuqoriroq qilib yopishi mumkin bo‘ladi. Shunda haqiqiy milliy qadriyatlarimiz nuqtayi nazaridan bemalol maktabga kelishlariga ruxsat etish mumkin. Lekin ikkinchi tomoni ham bor, bu istisno. Bu degani ertaga hamma faqat shunaqa kelishi kerak, bemalol yurgan qizlarimizni ham olib kelib ‘mana shunaqa ro‘mol o‘rashing kerak’, deb majburlash ham bo‘lib qolmasin. Buning tagidagi maqsad — qizlarimizni o‘qitish”, — deya oydinlik kiritadi vazir.
Avvalroq Xalq ta’limi vazirligi o‘quvchi qizlarning maktabga hijobda borishlari mumkinligi haqidagi savollarga munosabat bildirib, xalq ta’limi vazirining 2020-yil 28-maydagi 131-son buyrug‘i bilan tasdiqlangan maktablarning ichki tartib va odob-axloq qoidalarining 8-bandiga ko‘ra o‘quvchilar belgilangan maktab formasida kelishlari shartligini eslatgandi.
Izoh (0)