Qashqadaryo viloyatining Yakkabog‘ tumanidagi Xazratovlar oilasida uch egizak farzand tug‘ildi, deb xabar beradi NasafNews.
Ma’lum qilinishicha, tumanning “G‘ozliq” mahallasi Qo‘tontepa qishlog‘ida istiqomat qiluvchi Muslimbek Xazratov va Navbahor Dushayeva oilasida 3 nafar egizak qizaloq dunyoga kelgan.
Qizaloqlarning bobosi Shodiyor Safarovning aytishicha, egizaklar 31-avgust kuni Toshkent shahridagi Perinatal markazda tug‘ilgan.
E’tiborlisi, ularga Prezident Shavkat Mirziyoyevning oila a’zolari – rafiqasi Ziroatxon, qizlari Shahnozaxon va Saidaxonning ismi qo‘yilgan. Shodiyor Safarovning aytishicha, bu borada Prezidentga xat yozib, ulardan rozilik ham olingan.
Eslatib o‘tamiz, 2020-yil oktabrida Buxoro viloyati Shofirkon tumanida 3 egizak tug‘ilgani, ularga Mirziyo, Miromon va Saida ismlari qo‘yilgani haqida xabar berilgan edi.2019-yilning mart oyida ham ushbu tumanda yashovchi boshqa bir oilada uch egizak tug‘ilgan, ularga Prezident Shavkat Mirziyoyev sharafiga Shavkat, Miromon va Mirziyo ismlari berilgandi. 2019-yilning oktabrida Buxoro shahrida yashovchi yana bir oilada uch egizak tug‘ilgandi. Chaqaloqlarga Shavkat, Mirziyo va Saida ismlari qo‘yilgandi. O‘sha yilning sentabr oyida Farg‘onada tug‘ilgan uch egizakka Bibixonim, Amirbek va Temurbek deb ism qo‘yilgan.
Shuningdek, 2019-yilda Jizzax, Xorazm, Buxoro, Qashqadaryo viloyatlarida tug‘ilgan uch egizaklarga Shavkat, Miromon va Mirziyo ismlari Farg‘onada tug‘ilgan uch egizakka esa Shavkatjon, Ziroatxon va Saidaxon ismlari qo‘yilgan.
Izoh (0)