Navoiy viloyatida katta pul evaziga fuqaroni ishga kiritib qo‘yishni aytgan shifokor qo‘lga tushdi, deya xabar bermoqda viloyat IIB axborot xizmati.
Qayd etilishicha, 2020-yil mansabini suiiste’mol qilgani bois, viloyat Sog‘liqni saqlash boshqarmasi tomonidan hayfsan olib, shartli ravishda Karmana tumani shoshilinch tez tibbiy yordam ko‘rsatish bo‘limida navbatchi shifokor lavozimiga tushirilgan 1970-yilda tug‘ilgan S.F. pora bilan qo‘lga tushdi.
Shifokor avval o‘zi bilan birga ishlagan hamshira M.T.ni ko‘rib qolib, ish o‘rni tavsiya qiladi. Ishga joylashtirishda vakolati bo‘lmasa-da yangidan ishga tushgan tug‘ruqxonaga tanishlari orqali ishga kiritib qo‘yishini aytadi. Buning uchun 7 million so‘m pul talab qiladi. Hamshira hozirgi paytda ishsiz bo‘lganligi bois mazkur pulni berishga rozi bo‘ladi.
Navoiy viloyati IIB JQB korrupsiya va iqtisodiy jinoyatlarga qarshi kurashish xodimlari tomonidan o‘tkazilgan tezkor tadbir natijasida S.F. 7 million so‘m pullar hamda M.T.ning shaxsiy hujjatlarini olayotgan paytda qo‘lga olindi.
Ayni paytda tergovga qadar tekshiruv harakatlari olib borilmoqda.
Bunda avval Buxoroda tibbiyot kollejiga 400 dollar evaziga o‘qishga kiritishni va’da qilgan shaxs ushlangani, Toshkentda fuqaroni Qirg‘izistonga o‘qishga kiritib, uni Toshkentdagi farmatsevtika institutiga ko‘chirib berish uchun 3,5 ming dollar so‘ragan shaxs qo‘lga olingani hamda Xorazmda yozgan arizasini qaytarib olish uchun korxona rahbaridan 180 million so‘m talab qilgan shaxs ushlangani haqida xabar berilgandi.
Izoh (0)