“Mash’al” bosh murabbiyiga musht tushirgan “Metallurg” rasmiy vakili 1 yilga diskvalifikatsiya qilindi

O‘zbekiston futbol assotsiatsiyasi Tartib-intizom qo‘mitasining navbatdagi yig‘ilishi bo‘lib o‘tdi.

Unda bir qator futbolchi hamda rasmiylarga nisbatan tartib-intizom choralari belgilandi. Jumladan, Superliganing 16-turi doirasidagi “Metallurg” — “Mash’al” uchrashuvi (1:2) yakunlangach, “Metallurg” jamoasi rasmiy vakili Shavkat Saidov o‘zini noprofessional tutgan holda, agressivlik bilan “Mash’al” bosh murabbiyi Aleksandr Xomyakovning ko‘krak qismiga mush bilan zarba bergandi. Ushbu xatti-harakati uchun Shavkat Saidovga bir yil muddatga futbol oid har qanday faoliyat bilan shug‘ullanishdan chetlashtirish intizom chorasi qo‘llanildi.

Shuningdek, klubdan ushbu rasmiy shaxsga 2021-yilgi mavsum uchun PFL tomonidan taqdim etilgan litsenziyani 3 kun muddat ichida topshirish talab etildi.

Yig‘ilishda yana bir qator futbolchilar va rasmiylarga nisbatan jazolar belgilandi:

Superliga 16-turi doirasidagi “Metallurg” — “Mash’al” uchrashuvi yakunidan so‘ng “Metallurg” futbol klubi a’zolari stadionda ommaviy tartibsizliklar keltirib chiqarib, hakamlar sha’niga haqoratli so‘zlar ishlatdi. “Metallurg” futbol klubi uchrashuvda tartib-intizomni ta’minlamagani, maydon va uning atrofida vujudga kelgan tartibsizliklarning oldi olinmagani uchun jazolanadi va klubga nisbatan jarima intizom chorasi qo‘llaniladi.

Superliganing 16-turidan o‘rin olgan “Paxtakor” — “OKMK” uchrashuvida olmaliqliklar futbolchisi Abbos Otaxonov bahsning 82-daqiqasida to‘p uchun kurash bo‘lmagan vaziyatda tirsagi bilan raqib o‘yinchisining yuziga zarba berib, o‘yin qoidasini qo‘pol ravishda buzgani uchun 3 ta o‘yinga diskvalifikatsiya qilindi va unga nisbatan jarima intizom chorasi qo‘llanildi.

U-18 chempionati 13-turi doirasidagi “Aral Samali U-18” — “Navbahor U-18” uchrashuvi 45+2-daqiqasida “Aral Samali U-18” jamoasi futbolchisi Baxit Perdebayev va “Navbahor U-18” jamoasi o‘yinchisi Sarvar Bahodirov nojo‘ya so‘zlar ishlatish orqali bir-birini haqorat qildi va keyinroq tajovuzkor xatti-harakatlar amalga oshirildi. Shu sababli Sarvar Bahodirov hamda Baxit Perdebayevga nisbatan 2 ta o‘yinga chetlashtirish intizom chorasi qo‘llanildi.

“Aral Samali U-18” – “Navbahor U-18” uchrashuvining 71-daqiqasida “Aral Samali U-18” futbolchisi Zulpuxar Quvanshibayev raqib o‘yinchisiga qasddan jarohat yetkazish maqsadida raqib oyog‘iga zarba bergani uchun 3 ta o‘yinga diskvalifikatsiya qilindi.