Dunyo va o‘zbek sportiga oid 2-sentabr kunining muhim xabarlari dayjesti bilan tanishing.
O‘zbekiston
Tokio shahrida Paralimpiya o‘yinlari o‘tkazilmoqda. 2-sentabr kuni 9 nafar o‘zbekistonlik sportchi musobaqada ishtirok etdi va bitta medal qo‘lga kiritildi.
Para-yengil atletikaning yadro uloqtirish bahslarida Husniddin Norbekov 16,13 metr natija qayd etdi va Tokio—2020 Paralimpiya o‘yinlarining oltin medalini qo‘lga kiritdi.
Shu tariqa O‘zbekiston delegatsiya hisobidagi umumiy medallar soni 16 (6 ta oltin, 4 ta kumush va 6 ta bronza) taga yetdi.Jahon
Krishtianu Ronaldu terma jamoadagi gollar soni bo‘yicha jahon rekordini yangiladi. U Portugaliya terma jamoasining JCh—2022 saralash bosqichi doirasidagi Irlandiyaga qarshi o‘yinida dubl qayd etib, Ali Daining rekordini yangiladi. Shu tariqa Krishtianuning Portugaliya terma jamoasidagi gollari soni 111 taga yetdi.
Qatar amiri Tamim bin Hamad at-Tani Kilian Mbappeni “Real”ga sotishga rozi bo‘lmagan, deb yozmoqda Maxifoot L’Equipe’ga tayanib. Nashrga ko‘ra, amir 2021/22-yilgi mavsumda Neymar, Lionel Messi va Mbappedan iborat trioning o‘yinini ko‘rishni xohlagan. Shu sabab moliyaviy tomondan yaxshi takliflar bo‘lganiga qaramay Parij klubi Mbappeni boshqa jamoaga qo‘yib yubormagan.
UEFA Yevro—2020 ning translyatsiyalari haqidagi ma’lumotlarni e’lon qildi. Turnir uchrashuvlarining jami tomoshabinlari 5,2 milliard kishini tashkil etgan.
Ma’lumotlarga ko‘ra, Yevro—2020 finalini 328 million kishi tomosha qilgan. Yevro—2016 ning hal qiluvchi o‘yinini ham shuncha odam kuzatib borgandi. Musobaqaning har bir o‘yinini esa 100 million odam jonli efirda tomosha qilgani aytilmoqda.
APLda avgust oyining eng yaxshi futbolchisi va murabbiyi nomiga da’vogarlar e’lon qilindi. Nomzodlar quyidagicha ko‘rinish oldi:
- Markos Alonso (“Chelsi”) — 3 ta o‘yin|1 ta gol;
- Mayl Antonio (“Vest Hem”) — 3 ta o‘yin|4 ta gol|3 ta assist;
- Said Benrahma (“Vest Hem”) — 3 ta o‘yin|2 ta gol|2 ta assist;
- Erik Dayer (“Tottenhem”) — 3 ta o‘yin|himoyadagi ishonchli harakatlar;
- Demarey Grey (“Everton”) — 3 ta o‘yin|2 ta gol;
- Meyson Grinvud (“Man Yunayted”) — 3 ta o‘yin|3 ta gol.
- Rafael Benites (“Everton”) — 2 g‘alaba|1 durang;
- Nunu Eshpiritu Santu (“Tottenhem”) — 3 ta g‘alaba;
- Devid Moyes (“Vest Hem”) — 2 g‘alaba|1 durang;
- Tomas Tuxel (“Chelsi”) — 2 g‘alaba|1 durang.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)