Samarqand shahrida sodir etgan jinoyati uchun javobgarlikdan qutulib qolish maqsadida tergovchiga 3 ming dollar pora berishga uringan ayol qo‘lga olindi. Bu haqda viloyat IIB axborot xizmati xabar berdi.
Ma’lum qilinishicha, 30-iyul kuni Samarqand shahri bo‘yicha IIO FMB xodimlari tomonidan o‘tkazilgan tezkor tadbirda Samarqand shahar Bog‘dod ko‘chasida yashovchi 45 yoshli S.Sh. yashash xonadonida fohishaxona tashkil etgani aniqlangan va holat yuzasidan jinoyat ishi qo‘zg‘atilgan.
S.Sh. qo‘zg‘atilgan jinoyat ishi yuzasidan Samarqand shahri bo‘yicha IIO FMB 3-son IIB Tergov bo‘linmasi tergovchisi yoniga kelib, uning ishini pul evaziga ijobiy tomondan hal qilib berishini so‘rab, 3 ming dollar miqdoridagi pullarni pora tariqasida taklif qilgan.
Xodim unga pora berish jinoyat ekanini bir necha marotaba tushuntirishiga qaramay, S.Sh. 28-avgust kuni 3 ming dollarni berish uchun kelishini aytib ketgan.
Holat yuzasidan tergovchi IIB boshlig‘i nomiga bildirgi bilan murojaat qilgan.
Bildirgiga asosan, 28-avgust kuni IIV ShXBB hududiy bo‘linmalari Samarqand viloyat bo‘yicha boshqarmasi hamda Samarqand shahar prokuraturasi tomonidan tezkor tadbir o‘tkazilib, fuqaro S.Sh. tergovchiga 3 ming dollar miqdoridagi pullarni pora tariqasida bergan vaqtida ushlanib, hujjatlashtirib olingan.
Holat yuzasidan jinoyat ishi qo‘zg‘atilib, tergov harakatlari olib borilmoqda.
Avvalroq Toshkentda vazirlikda ishlashini aytib, o‘qishga kiritib qo‘yish evaziga fuqarodan 10 ming dollar olgan shaxs ushlangani, Surxondaryoda 1 mln so‘m pora olmagan YPX inspektori televizor bilan mukofotlangani, Surxondaryoda 10 mln so‘m evaziga er-xotin ajrimini tezlashtirishni va’da qilgan soxta advokat qo‘lga olingani to‘g‘risida xabar berilgandi.
Izoh (0)