Shavkat Mirziyoyev O‘zbekiston mustaqilligining 30 yilligiga bag‘ishlangan davlat tadbirida so‘zlagan nutqida aholini turmush darajasi va uy joy bilan ta’minlash bo‘yicha qilinayotgan ishlar haqida ma’lumot berdi, deya xabar qilmoqda “Daryo” muxbiri.
Prezidentning ta’kidlashicha, oylik ish haqi 2,7 million so‘mni tashkil qilib, 2016-yilga nisbatan 2,1 barobarga oshirilgan.
“Iqtisodiyot tarmoqlarining rivojlanish sur’atini aholining real yalpi daromadi 2016-yilga nisbatan 28 foizga o‘sganida ham ko‘rish mumkin.
Hozirgi kunda nominal hisoblangan o‘rtacha oylik ish haqi 2,7 million so‘mni tashkil qilib, 2016-yilga nisbatan 2,1 barobarga oshirildi.
Mana, yaqinda qabul qilingan Farmonga binoan, mamlakatimizda 1-sentabrdan ish haqi, pensiyalar, stipendiya va nafaqalar miqdorini yana oshirdik.
Biz bundan buyon ham aholimizning daromadi va turmush darajasini muntazam yaxshilab borishga jiddiy ahamiyat qaratamiz”, – deydi Prezident.
Shavkat Mirziyoyev nutqi davomida 2017–2020-yillar davomida 140 mingdan ziyod arzon va sifatli uy-joylar bunyod etilganini ma’lum qildi.
“Yurtimizda ijtimoiy muammolarni hal etishning o‘ziga xos yangi tizimi yaratilganidan barchangiz yaxshi xabardorsiz.'Temir daftar’,'ayollar daftari’,'yoshlar daftari’,'mehr daftari’,'mahallabay’ ishlash usullari aynan shu maqsadda joriy etilmoqda.
Islohotlar doirasida qabul qilingan yirik dasturlar jamiyatimizda ijtimoiy muhitni yaxshilash va aholi farovonligini oshirishga xizmat qilmoqda. Birgina “Obod qishloq” va “Obod mahalla” dasturlarini oladigan bo‘lsak, 2021-yilning o‘zida jami 8 mingga yaqin qishloq va mahallada umumiy qiymati 20 trillion so‘mlik qurilish, ta’mirlash va obodonlashtirish ishlari olib borilayotgani, o‘ylaymanki, ko‘p narsadan dalolat beradi.
Bu ishlarning barchasi “Yangi O‘zbekistonda erkin va farovon yashaylik” degan ezgu da’vat asosida amalga oshirilmoqda.
Aholini uy-joy bilan ta’minlash masalasi ham biz uchun ustuvor vazifa bo‘lib kelmoqda. 2017–2020-yillar davomida 140 mingdan ziyod arzon va sifatli uy-joylar bunyod etildi. Ushbu ko‘rsatkich 2016-yilga nisbatan qariyb 11 barobar oshdi. Respublikamizda ipoteka tizimi izchil rivojlanmoqda.
Shuni ta’kidlash zarurki, yurtimizda ilgari hech qachon bunday katta ko‘lamdagi qurilish ishlari amalga oshirilmagan.
Og‘ir turmush sharoitida yashayotgan oilalarning uy-joy bo‘yicha boshlang‘ich badallari davlat byudjeti hisobidan to‘lab berilmoqda. Bu yo‘nalishdagi ishlarimiz davom ettiriladi, shu yilning o‘zida yana 50 mingga yaqin oila uy-joy bilan ta’minlanadi”, – deydi Shavkat Mirziyoyev.
Izoh (0)