Rossiya prezidenti Vladimir Putin va AQSh prezidenti Jo Baydenning yuzma-yuz muzokaralari 16-iyun kuni Jenevadagi La Grange villasida bo‘lib o‘tadi. Bu haqda Shveysariya tashqi ishlar vazirligiga tayanib, “Interfaks” xabar berdi.
La Grange villasi
Foto: EPA
“Mashhur La Grange villasi 16-iyun kuni prezidentlar Bayden va Putinning sammitiga mezbonlik qiladi. Uchrashuv joyi sifatida Jenevani tanlash orqali bildirilgan ishonch uchun Shveysariya ikki mamlakatga ham minnatdorchilik bildiradi”, — deyiladi vazirlikning Twitter’ida.
The iconic Villa La Grange will host Presidents Biden 🇺🇸 and Putin 🇷🇺 on June 16. Switzerland thanks the two countries for the trust expressed by choosing #Geneva@POTUS @KremlinRussia_E pic.twitter.com/Q8vag8hhhL
— Swiss MFA (@SwissMFA) June 10, 2021
Rossiya prezidenti matbuot kotibi Dmitriy Peskov ham La Grange villasi Amerika va Rossiya rahbarlarining uchrashuv joyiga aylanishini tasdiqladi. Peskovning qo‘shimcha qilishicha, Vladimir Putin Jenevaga muzokaralar o‘tkaziladigan kun —16-iyunda jo‘nab ketadi.
XVIII asrda qurilgan La Grange villasi shu nomdagi bog‘ markazida joylashgan. Villadagi xonalardan birida o‘n minglab qadimiy va qimmatbaho kitoblarni o‘z ichiga olgan kutubxona mavjud.
Foto: Reuters
8-iyun kuni Jenevada bo‘lajak uchrashuvga tayyorgarlikning faol bosqichi boshlandi. Xususan, La Grange parkini tayyorlash uchun umumiy tozalash ishlari olib borildi, shuningdek, park mehmonlar uchun yopildi.
Mahalliy ommaviy axborot vositalari ta’kidlashicha, park hududida xavfsizlik choralari bosqichma-bosqich kuchaytirilmoqda. Bog‘ga yaqin joylashgan ko‘chalarda avtoulovlarni to‘xtatish taqiqlandi. Park yaqinidagi Jeneva ko‘li bo‘yida havo hujumidan mudofaa tizimlari va radarlarni vaqtinchalik joylashtirish rejalashtirilgan.
Bog‘ atrofida bir necha kilometrlik panjara o‘rnatilmoqda. Shveysariya OAVlari ta’kidlashicha, bu vazifa oson bo‘lmagan, chunki Jenevaning o‘zida bunday to‘siqlar yetarli emas, shuning uchun ularni mamlakatning boshqa shaharlaridan olib kelishga to‘g‘ri kelgan.
OAV xabar berishicha, shu hafta Hotel Intercontinental mehmonxonasi atrofida antennalar va maxsus jihozlarga ega zirhli mashinalar paydo bo‘lgan. Ushbu transport vositalari Amerika prezidentining xavfsizligini ta’minlashda foydalaniladi Tribyun de Jenev gazetasining yozishicha, Bayden aynan shu mehmonxonada qolishi mumkin.
