Isroil Knesseti (parlamenti) a’zolari mart oyida bo‘lib o‘tgan saylov natijalari bo‘yicha “Yesh Atid” hamda “Yamina” partiyalari rahbarlari Yair Lapid va Naftali Bennet tomonidan tuzilgan yangi hukumatni tasdiqladi. Bu haqda Times of Israel gazteasiga tayanib, “RBK” xabar berdi.
Foto: Reuters
Xabarga ko‘ra, Bennet boshchiligida tuzilgan yangi hukumat uchun 120 deputatdan 60 nafari ovoz berdi, 59 nafari qarshi chiqdi, bittasi betaraf qoldi. 2009-yildan beri 12 yil davomida bosh vazir lavozimini egallab kelayotgan Binyamin Netanyaxu hukumatdagi faoliyatini to‘xtatdi.
“Yamina” partiyasi rahbari Bennet mamlakatning 13-bosh vaziri sifatida qasamyod qabul qilib, “Isroil va uning qonunlariga sodiq qolishga, bosh vazir vazifalarini va Knesset qarorlarini sidqidildan bajarishga” va’da berdi.
“Yesh Atid” partiyasi yetakchisi Lapid esa “Vazirlar Mahkamasining muqobil rahbari”ga aylandi — ikki yildan so‘ng u Bennet bilan joy almashadi. “Yesh Atid” deputati Mika Levi Knesset spikeri etib saylandi.
Koalitsiya “O‘zgarishlar bloki” deb nomlandi, uning tarkibiga sakkizta partiya kiritildi: “Yesh Atid”, “Yamina”, “Tikva Xadasha” (“Yangi umid”), “Isroil — uyimiz”, “Kaxol-Lavan” markazchi ittifoqi, “Avoda” markaziy so‘l sotsial-demokratik partiyasi, “Merets” va “Raam” chap qanot sotsial-demokrat partiyalari. Hukumatda endi Netanyaxuning “Likud” partiyasi vakillari bo‘lmaydi.
Isroilda muddatidan oldin parlament saylovlari 23-mart kuni bo‘lib o‘tgan edi. Shundan so‘ng Netanyaxu hukumat tuzishni boshladi. 5-may kuni buning uchun ajratilgan vaqt nihoyasiga yetdi. Muddat tugashidan biroz oldin Netanyaxu prezidentga hukumat tuzolmasligini aytdi va o‘z mandatini qaytarib berdi. Shundan so‘ng, mandat Lapidga berildi.
Netanyaxu iyun boshida yangi tuzilgan hukumat koalitsiyasini demokratiya tarixidagi “saylovning eng katta firibgarligi” natijasi deb ta’rifladi.
Netanyaxu 1996—1999-yillarda Isroilning bosh vaziri bo‘lib ishlagan, keyinchalik 2009-yilda yana ushbu lavozimni egallagan. Bungacha u to‘rt yil davomida Knessetdagi muxolifatning yetakchisi bo‘lgan.
Isroilda prezident asosan marosim va vakillik vazifalarini bajaradi. Haqiqiy hukumat bosh vazirning qo‘lida bo‘ladi.
