Yaponiyada Amerikaning Moderna kompaniyasi tomonidan ishlab chiqariladigan koronavirusga qarshi vaksinalarda yot moddalar aniqlandi, deb yozadi Meduza. 26-avgust kuni Yaponiya Sog‘liqni saqlash, mehnat va farovonlik vazirligi beshta prefekturadagi vaksinatsiya markazlarida ochilmagan 39 ta ampulada qandaydir modda, aniqrog‘i — kattaligi bir necha millimetrdan oshmaydigan qora zarrachalar topilganini ma’lum qildi. Kyodo agentligi ta’kidlashicha, bu metall zarralari bo‘lishi mumkin, chunki ular magnitlarga reaksiya ko‘rsatmoqda.
Hodisa tufayli Yaponiya Sog‘liqni saqlash vazirligi xavfsizlik yuzasidan mamlakatga Ispaniyaning Rovi SA farmatsevtika kompaniyasi korxonalaridan uchta partiyada kelib tushgan 1,63 million doza Moderna vaksinasidan foydalanishni to‘xtatdi. Uchta partiyaning barchasi bitta ishlab chiqarish liniyasida deyarli bir vaqtning o‘zida tayyorlangan. Yaponiyaga yetkazib berilgach, ular 863 ta vaksinatsiya markaziga tarqatilgan. Yot zarralar topilgani uchun ushbu markazlarga qo‘shimcha dozada vaksinalar yetkaziladi.
Potensial zaharlangan partiyalardan 500 ming kishi emlangan bo‘lishi mumkin, deya ma’lum qildi Yaponiyada emlash jarayonlari uchun mas’ul bo‘lgan vazir Taro Kono 27-avgust kuni. Masalan, Tokioda, taxminan, 9100, Osakada 50 ming, Xiogoda 41,5 ming odam emlangan bo‘lishi mumkin. Potensial xavfli vaksina dozalari, shu jumladan, Yaponiyaning eng yirik All Nippon Airways aviakompaniyasi, Toyota avtomobil ishlab chiqaruvchisi va East Japan Railway Company yo‘lovchi temiryo‘l kompaniyasi xodimlariga ham qo‘llanilgan.
Ampulalarda yot moddalar ilk marta 16-avgustdayoq aniqlangan, ammo vaksinani sotish va tarqatish uchun mas’ul bo‘lgan Takeda Pharmaceutical kompaniyasi SSVga bu haqda 25-avgustdagina xabar bergan. Shuncha vaqt nima sababdan ma’lum qilinmagani aniq emas. Ispaniyaning Rovi kompaniyasidan ma’lum qilishlaricha, moddalar topilgan vaksina partiyalari faqat Yaponiyaga yuborilgan.
Potensial xavfli partiyadan Moderna vaksinasining ikkinchi dozasini olgan ikki erkak uch kundan keyin vafot etgan. Gap tegishli ravishda 15 va 22-avgustda ikkinchi doza bilan emlangan 38 va 30 yoshli erkaklar haqida bormoqda. SSV ma’lumotlariga ko‘ra, vaksinaning ikkala ampulasida ham yot moddalar topilmagan. Ularning o‘limi vaksinatsiya bilan bog‘liq yoki yo‘qligi noma’lum, deyiladi vazirlik xabarida. Ularda surunkali kasalliklar va allergik reaksiyalar aniqlanmagan edi. Moderna va Takeda ushbu o‘limlar vaksina tufayli yuzaga kelgani bo‘yicha dalillar yo‘qligini bildirdi. Yaponiyada vaksinatsiya boshlanganidan buyon koronavirusga qarshi emlangan qariyb ming kishi vafot etgan, ammo ularning o‘limi aynan vaksina bilan bog‘liqligi aniqlanmagan.
28-avgust kuni kechqurun Moderna vaksinasining yana bir partiyasida qora va pushti rangli moddalar topildi. Ushbu partiya raqami SSV tomonidan foydalanish to‘xtatilgan boshqa uchta partiyanikidan farq qiladi. Zarrachalar Okinava ma’muriy markazi Naxa shahridagi ommaviy vaksinatsiya markazida qo‘llash rejalashtirilgan ampulalarda aniqlangan. U yerda emlash kampaniyasi to‘xtatib qo‘yildi. Prefektura hukumati aytishicha, ushbu partiyadan 400 kishi emlangan, ammo tibbiyot xodimlari ampuladagi vaksinalar tozaligiga ko‘z bilan ishonch hosil qilgan. Takeda kompaniyasi Moderna’dan zudlik bilan tekshiruv o‘tkazib, moddalar qoldiqlari qayerdan paydo bo‘lganini aniqlashni talab qildi.
Rasmiy ma’lumotlarga ko‘ra, Yaponiyada aholining 43,5 foizi to‘liq emlangan (mamlakatda jami 126 million odam yashaydi).
Izoh (0)