Qozog‘iston janubidagi Jambil viloyatida avvalroq yong‘in sodir bo‘lib, o‘q-dorilar portlab ketgan harbiy qismda 29-avgust, yakshanba kuni yana bir portlash yuz berdi, deb yozadi “Interfaks” respublika Mudofaa vazirligiga tayanib.
Mudofaa idorasi xabarida aytilishicha, “26-avgust kuni yong‘in yuz bergan muhandislik o‘q-dorilar omborida bugun, 29-avgust kuni soat 12:20 atrofida (Toshkent vaqti bilan soat 11:20) portlash ovozi qayd etilgan”.
Ta’kidlanishicha, qurbonlar va jabrlanganlar yo‘q, voqea joyida odamlar bo‘lmagan. Sabablar aniqlashtirilmoqda.
Eslatib o‘tamiz, 26-avgust kuni kechqurun Qozog‘istonning Jambil viloyatida muhandis-sapyorlik brigadasi joylashgan 28349-sonli harbiy qismda yong‘in sodir bo‘ldi. Alanga muhandislik o‘q-dorilar joylashgan omborni qamrab oldi, shundan keyin bir necha marta portlash yuz berdi. Qozog‘iston hukumati hodisaning bir nechta sabablarini ko‘rib chiqmoqda, qasddan o‘t qo‘yish versiyasini ham istisno qilmayapti.
Avvalroq favqulodda vaziyatlar vaziri Yuriy Ilyin harbiy ombordagi o‘q-dorilarning qayta portlashi xavfini to‘liq bartaraf qilish uchun 2—3 kun talab qilinishini bildirgandi. Ayni paytda voqea joyida ikkita o‘choq tutashda davom etmoqda. Mudofaa vazirligi sapyorlari va o‘t o‘chiruvchilar qayta portlash xavfi yo‘qligiga ishonch hosil qilish uchun ushbu o‘choqlarda ish olib bormoqda.
Izoh (0)