Японияда Американинг Moderna компанияси томонидан ишлаб чиқариладиган коронавирусга қарши вакциналарда ёт моддалар аниқланди, деб ёзади Meduza. 26 август куни Япония Соғлиқни сақлаш, меҳнат ва фаровонлик вазирлиги бешта префектурадаги вакцинация марказларида очилмаган 39 та ампулада қандайдир модда, аниқроғи — катталиги бир неча миллиметрдан ошмайдиган қора заррачалар топилганини маълум қилди. Kyodo агентлиги таъкидлашича, бу металл зарралари бўлиши мумкин, чунки улар магнитларга реакция кўрсатмоқда.
Ҳодиса туфайли Япония Соғлиқни сақлаш вазирлиги хавфсизлик юзасидан мамлакатга Испаниянинг Rovi SA фармацевтика компанияси корхоналаридан учта партияда келиб тушган 1,63 миллион доза Moderna вакцинасидан фойдаланишни тўхтатди. Учта партиянинг барчаси битта ишлаб чиқариш линиясида деярли бир вақтнинг ўзида тайёрланган. Японияга етказиб берилгач, улар 863 та вакцинация марказига тарқатилган. Ёт зарралар топилгани учун ушбу марказларга қўшимча дозада вакциналар етказилади.
Потенциал заҳарланган партиялардан 500 минг киши эмланган бўлиши мумкин, дея маълум қилди Японияда эмлаш жараёнлари учун масъул бўлган вазир Таро Коно 27 август куни. Масалан, Токиода, тахминан, 9100, Осакада 50 минг, Хиогода 41,5 минг одам эмланган бўлиши мумкин. Потенциал хавфли вакцина дозалари, шу жумладан, Япониянинг энг йирик All Nippon Airways авиакомпанияси, Toyota автомобиль ишлаб чиқарувчиси ва East Japan Railway Company йўловчи темир йўл компанияси ходимларига ҳам қўлланилган.
Ампулаларда ёт моддалар илк марта 16 августдаёқ аниқланган, аммо вакцинани сотиш ва тарқатиш учун масъул бўлган Takeda Pharmaceutical компанияси ССВга бу ҳақда 25 августдагина хабар берган. Шунча вақт нима сабабдан маълум қилинмагани аниқ эмас. Испаниянинг Rovi компаниясидан маълум қилишларича, моддалар топилган вакцина партиялари фақат Японияга юборилган.
Потенциал хавфли партиядан Moderna вакцинасининг иккинчи дозасини олган икки эркак уч кундан кейин вафот этган. Гап тегишли равишда 15 ва 22 августда иккинчи доза билан эмланган 38 ва 30 ёшли эркаклар ҳақида бормоқда. ССВ маълумотларига кўра, вакцинанинг иккала ампуласида ҳам ёт моддалар топилмаган. Уларнинг ўлими вакцинация билан боғлиқ ёки йўқлиги номаълум, дейилади вазирлик хабарида. Уларда сурункали касалликлар ва аллергик реакциялар аниқланмаган эди. Moderna ва Takeda ушбу ўлимлар вакцина туфайли юзага келгани бўйича далиллар йўқлигини билдирди. Японияда вакцинация бошланганидан буён коронавирусга қарши эмланган қарийб минг киши вафот этган, аммо уларнинг ўлими айнан вакцина билан боғлиқлиги аниқланмаган.
28 август куни кечқурун Moderna вакцинасининг яна бир партиясида қора ва пушти рангли моддалар топилди. Ушбу партия рақами ССВ томонидан фойдаланиш тўхтатилган бошқа учта партияникидан фарқ қилади. Заррачалар Окинава маъмурий маркази Наха шаҳридаги оммавий вакцинация марказида қўллаш режалаштирилган ампулаларда аниқланган. У ерда эмлаш кампанияси тўхтатиб қўйилди. Префектура ҳукумати айтишича, ушбу партиядан 400 киши эмланган, аммо тиббиёт ходимлари ампуладаги вакциналар тозалигига кўз билан ишонч ҳосил қилган. Takeda компанияси Moderna’дан зудлик билан текширув ўтказиб, моддалар қолдиқлари қаердан пайдо бўлганини аниқлашни талаб қилди.
Расмий маълумотларга кўра, Японияда аҳолининг 43,5 фоизи тўлиқ эмланган (мамлакатда жами 126 миллион одам яшайди).
Изоҳ (0)