Mo‘g‘uliston emlash sur’atlari bo‘yicha Osiyoda yetakchilik qilmoqda, “Sputnik V” 6 oydan keyin immunitetni kuchaytiradi. Koronaxabarlar

Jons Hopkins universiteti ma’lumotlariga ko‘ra, dunyoda koronavirusga chalinganlar soni 213 967 020 kishiga yetgan, shularning 4 464 245 nafari vafot etgan. Kasallanganlar soni bo‘yicha AQSh (38,2 million), Hindiston (32,5 million), Braziliya (20,6 million), Fransiya (6,75 million) va Rossiya (6,7 million) yetakchilik qilmoqda.

Shuningdek, dunyo bo‘yicha qo‘llanilgan vaksinalar soni 5,062 milliarddan oshgan.

Mo‘g‘ulistonda 25-avgust holatiga aholining 68,6 foizi COVID-19’ga qarshi vaksinaning birinchi dozasini olgan, 63,5 foizi esa to‘liq emlangan. Mo‘g‘uliston vaksinatsiya sur’atlari bo‘yicha Osiyo mintaqasida yetakchilikni saqlab qolmoqda, deyiladi Respublika Sog‘liqni saqlash vazirligi xabarida.

Mo‘g‘ulistonning 2 067 391 nafar fuqarolari to‘liq emlangan bo‘lsa, 2 231 314 kishi kamida bitta dozani olgan.

Mamlakatda ommaviy emlash 23-fevralda boshlangan.

Organizmning koronavirus shtammlariga qarshi himoyasi Rossiyaning “Sputnik V” vaksinasi bilan emlangandan keyin olti oy mobaynida kuchayadi, deya ma’lum qildi Rossiya to‘g‘ridan to‘g‘ri investitsiyalar fondi Argentinada o‘tkazilgan tadqiqot natijalariga tayanib. Olimlar antitanalar shakllanishi va ularning Alfa, beta, gamma, delta va lyambda shtammlariga qarshi zararsizlantiruvchi xususiyatini tahlil qildi.

“Kuzatuvlarga ko‘ra, organizmning immunitetni yorib o‘tishga qodir mutatsiyalardan iborat yangi shtammlarga qarshi himoyasi  vaksinatsiyadan keyin olti oy davomida kuchayadi, bu zararsizlantiruvchi antitanalar yetilishda davom etishi va ularning samaradorligi oshishi bilan bog‘liq”, — deyiladi fond saytida.

Argentinalik olimlar “Sputnik V” bilan emlangan bemorlardan olingan 1,8 mingta qon zardobi namunalarini tekshirib chiqdi.

IgG maxsus antitanalar umumiy soni asta-sekinlik bilan qisqarganiga qaramay, ularning qarshilik ko‘rsatish qobiliyati kuchaygan, ayniqsa, beta va gamma shtammlarga nisbatan. Ushbu shtammlar “immunitetdan qochish”ga eng ko‘p moyildir, ya’ni kasallangan odamning immun tizimidan yashirinish xususiyatiga ega.

Rossiyada koronavirusdan kunlik o‘limlar soni bo‘yicha antirekord o‘rnatildi: o‘tgan bir kecha-kunduzda mamlakatda 820 kishi virus oqibatida vafot etdi, bu pandemiya boshidan buyon kuzatilgan yangi rekorddir.

Bundan avvalgi eng yuqori ko‘rsatkich 14-avgustda qayd etilgan, o‘shanda 819 kishi vafot etgandi.

Shu tariqa, tezkor shtab ma’lumotlari bo‘yicha, Rossiya koronavirus oqibatidagi o‘limlar soni jami 179,2 mingtaga yetdi.

Shuningdek, bir kunda 19,6 ming kishida COVID-19 aniqlandi. Kasallanganlar va o‘limlar soni bo‘yicha Moskva va Peterburg yetakchilik qilmoqda.

Yaponiyada Moderna kompaniyasi vaksinasi bilan emlash to‘xtatildi. Bunga ushbu vaksinalarda noma’lum aralashmalar aniqlangani sabab bo‘ldi. Ushbu dozalar Yaponiyaga Ispaniyadan keltirilgan. Yaponiya Sog‘liqni saqlash, mehnat va farovonlik vazirligi tekshiruv boshladi.

Yot zarralar 39 ta ampulada topilgan, ularning kattaligi bir necha millimetrga yetgan. Vaksinaning ushbu dozalari Yaponiyaning beshta prefekturasida, shu jumladan, Tokioda joylashgan vaksinatsiya markazlarida bo‘lgan.

Hozircha ushbu holat sababli yuzaga kelgan muammolar haqida xabarlar kelib tushmagan. Amerikaning Moderna kompaniyasi ham tekshiruv boshlagan.

Shuningdek:

• Kolumbiyaning Kali shahrida yashovchi erkak koronavirusga qarshi yetti marta emlandi. U turli kompaniyalar, shu jumladan, Sinovac, AstraZeneca, Pfizer va Janssen vaksinalarini olgan. Ammo, dozalarning ko‘pligi tufayli organizm hech qanday reaksiya ko‘rsatmagan. U 60 yoshdan oshgan va ruhiy muammolari bor odam bo‘lib chiqdi. Hukumat tekshiruv boshladi.
• Gretsiyada 13-sentabrdan emlanmaganlar uchun cheklovlar joriy qilinadi. Xususan, ularning kafe, bar, restoran, klublarga hamda ko‘ngilochar markazlarga kirishi taqiqlanadi. Shu bilan birga, manfiy natijali PZR-test bilan ular teatr, kino, muzey va trenajyor zallariga kirishi mumkin. Ushbu cheklovlar 2022-yil 31-martgacha amal qiladi.
• Polshada koronavirusning to‘rtinchi to‘lqini boshlanmoqda. U sentabr va oktabrda kuchayishi kutilmoqda. Hukumat cheklovlar kiritishga tayyorlanmoqda, ammo hozircha aniq bir qarorlar yo‘q.