AQSh Kobul aeroportidan o‘z qo‘shinlarini olib keta boshladi. Bu Afg‘onistonda amerikaliklar nazorati ostida qolgan yagona obyekt

Amerikalik harbiy xizmatchilar Kobul aeroportini tark eta boshladi. Bu haqda Pentagon vakili Jon Kirbi ma’lum qildi, deb yozadi The Hill.

Aeroport hududida nechta AQSh harbiy xizmatchisi qolayotganiga u aniqlik kiritmadi.

Avvalroq AQSh Markaziy razvedka boshqarmasining Kobul aeroporti tashqarisidagi so‘nggi tayanch punktini portlatgan edi.

Bayden Kobul aeroportiga yangi hujumlar ehtimoli haqida ogohlantirdi

AQSh Qurolli Kuchlari katta ehtimol bilan Kobul aeroporti yaqin 24—36 soat ichida yana hujumga uchrashi mumkinligini istisno qilmayapti. Prezidentning so‘zlariga ko‘ra, qo‘mondonlik uni topshiriqni bajara olishiga ishontirgan. Ammo Afg‘oniston poytaxtidagi xavfli vaziyatga qaramasdan, AQSh evakuatsiyani davom ettirmoqda.

AQShning Afg‘onistondagi elchixonasi Amerika fuqarolaridan xavfsizlik yuzasidan Kobul aeroporti atroflarini zudlik bilan tark etishni so‘radi.

Shuningdek, Bayden Afg‘onistondan barcha amerikalik diplomatlarni chaqirib olmoqchi. Biroq AQSh hukumati evakuatsiya bo‘yicha operatsiya o‘tkazilganidan keyin diplomatlar Afg‘onistonga qaytib borish-bormasligini hozircha bilmaydi.

Avvalroq “Tolibon” qo‘shinlar olib ketilganidan keyin diplomatik ishtirokini saqlab qolishni AQShdan so‘ragan. Davlat departamenti rasmiy vakiliga ko‘ra, bu masalada qaror qabul qilinganicha yo‘q.

Deyarli barcha mamlakatlar evakuatsiyani yakunladi

Afg‘onistondan chet el qo‘shinlarini olib ketish uchun belgilangan so‘nggi muddatga uch kun qolganida (28-avgust kuni) deyarli barcha mamlakatlar Kobul aeroportida tinch fuqarolarni evakuatsiya qilish bo‘yicha o‘z operatsiyalarini yakunladi va endi NATO mamlakatlari harbiy xizmatchilari bu mamlakatni tark etmoqda.

Xususan, Fransiya, Italiya, Niderlandiya, Belgiya, Daniya, Polsha va Vengriya evakuatsiyani yakuniga yetkazdi. 14-avgustdan buyon AQSh Afg‘onistondan 100 mingdan ortiq odamni evakuatsiya qilishga ulgurdi.

“Tolibon” aeroport yo‘lini to‘sishni boshladi

28-avgust, shanba kuni kechki paytga kelib, afg‘onistonliklar uchun Kobul aeroportiga kirish deyarli yopildi. “Tolibon” harakati jangarilari olomon to‘planishiga yo‘l qo‘ymaslik uchun aeroportga kiraverishda qo‘shimcha nazorat-o‘tkazish punktlarini joylashtirdi. Ayni paytda avvalroq odamlar aeroportga kirib olish umidida to‘planib turgan joylarning ko‘pchiligi bo‘shab qolgan.

Kobul aeroportini endi kim nazorat qiladi?

“Tolibon” harakati aeroportdan amerikaliklar ketganidan keyin uning ustidan texnik nazorat olib borishni Qatarga yoki Turkiyaga topshirmoqchi.

“Eshitishimga qaraganda, ‘Tolibon’ aeroportni, parvozlarni texnik jihatdan kim boshqarishi haqida o‘ylamoqda. Turkiya, Qatar ko‘rib chiqilmoqda… Tushunishimcha, ular to‘ydan oldin nog‘ora chalmoqchi emas, ham ular dispetcherlik punktidagi vazifalarni o‘zlari bajara olmasligini tushunadi, ularda bunday tajriba yo‘q, ular mutaxassislarni qidirmoqda”, — dedi Rossiyaning Afg‘onistondagi elchisi Dmitriy Jirnov.

Avvalroq Turkiya Afg‘onistondan chet el qo‘shinlari olib ketilganidan keyin Kobul aeroportini boshqarish istagini bildirgandi. Shu bilan birga, Turkiya prezidenti Rajab Toyyib Erdo‘g‘onning so‘zlariga ko‘ra, bunday taklif Anqaraga “Tolibon”dan kelib tushgan, biroq bu masalada qaror qabul qilinganicha yo‘q.

“Tolibon” vakillari, o‘z navbatida, Turkiyaning Afg‘onistondagi harbiy ishtiroki yakunlanganini ma’qulladi.

Kobul aeroporti 15-avgust kuni “Tolibon” harakati jangarilari Afg‘oniston poytaxtini va butun mamlakat hududini o‘z nazorati ostiga olganidan buyon amerikalik harbiy xizmatchilar boshqaruvi ostida bo‘lib kelayotgan edi. Kobul aeroportiga qariyb olti ming nafar Amerika harbiy xizmatchilari joylashtirilgandi. 26-avgust kuni ularning 13 nafari IShID o‘z zimmasiga olgan portlashda qurbon bo‘ldi.