31-yanvardan beri Gonkongning 64 900 ga yaqin aholisi Britaniyaning chet eldagi hududlariga viza olish uchun ariza topshirgan. 47 mingdan ziyod arizachining vizalari allaqachon tasdiqlangan, deb yozadi South China Morning Post.
Bu raqamlar Gonkong aholisining ommaviy chiqib ketish tendensiyasini namoyish qildi.
2020-yilning iyun oyida Gonkongda Xitoyga qarshi namoyishlar uchun javobgarlikni kuchaytirish to‘g‘risida milliy xavfsizlik qonuni qabul qilindi. Bunga javoban Buyuk Britaniya Gonkong aholisi uchun maxsus viza dasturini yaratdi.
Buyuk Britaniyaning chet eldagi hududlariga vizalar gonkongliklarga Buyuk Britaniyada har biri 5 yildan bo‘lgan ikki muddat davomida ishlash va o‘qish, shuningdek, soddalashtirilgan sxema bo‘yicha fuqarolikka ariza topshirish imkonini beradi.
Britaniya hukumatining hisob-kitoblariga ko‘ra, Gonkongning 5,4 million aholisi yangi viza olish uchun ariza topshirishi mumkin — bu shaharda yashovchi yetti yarim million aholining 70 foizdan ko‘prog‘i degani.
Gonkong bir yarim asr davomida Britaniya mustamlakasi bo‘lgan, lekin 1997-yilda avtonomlikni saqlab qolish sharti bilan Xitoyga qaytarilgan. Ammo so‘nggi bir necha yil ichida Xitoy hukumati Gonkongdagi demokratik muxolifatni bostirishga qaratilgan qator qonunlar qabul qildi. Buyuk Britaniya bayonotiga ko‘ra, bu Gonkongni Xitoyga o‘tkazish to‘g‘risidagi shartnoma shartlarini buzmoqda.
Izoh (0)