Tojikiston sog‘liqni saqlash va ijtimoiy himoya vaziri Jamoliddin Abdullozoda mamlakat prezidenti Imomali Rahmonning jiyanlari tomonidan kaltaklangani haqidagi xabarni rad etdi.
Hukumatning “Jumhuriyat” gazetasiga bergan intervyusida vazir bu mish-mishlar uning uchun kutilmagan bo‘lganini aytdi.
“Bunday mish-mishlarni tarqatganlar, men xizmat safarida vazirlik shtab-kvartirasining koronavirus bo‘yicha onlayn yig‘ilishlarida qatnashganimni payqashi kerak edi. Bu ommaviy axborot vositalarida men haqimda mish-mish tarqatganlarga javob. Onlayn uchrashuvlarga tashrif buyurgan barcha tibbiyot muassasalari rahbarlari meni ko‘rgan”, — dedi vazir.
Avvalroq Tojikiston ichki ishlar vaziri Ramazon Rahimzoda matbuot anjumanida “sog‘liqni saqlash va aholini ijtimoiy muhofaza qilish vazirining kaltaklanishi to‘g‘risida militsiyaga hech qanday shikoyat yoki ma’lumot kelib tushmaganini” aytgandi.
Tojikiston rahbari Imomali Rahmonning uch nafar jiyani shifokorlar va amaldorlarni, jumladan, sog‘liqni saqlash vazirini ayovsiz kaltaklagani haqida “Ozodi” radiosi o‘z manbalariga tayanib xabar bergandi. Radio xabariga ko‘ra, voqea 20-iyul kuni kechqurun, Tojikiston prezidentining singlisi Qurbonbi Rahmonova COVID-19 dan vafot etganidan hech qancha o‘tmay yuz bergan.
“Kaltaklanish natijasida sog‘liqni saqlash vaziri Jamoliddin Abdullozodaning jag‘iga qattiq zarba berilgan, prezident ijro etuvchi apparati huzuridagi Tibbiyot markazi rahbari Xolmaxmad Rahimzoda boshidan jarohat olgan. Qolgan shifokorlar yengil tan jarohatlari olgan ”, — deyiladi “Ozodi” radiosi xabarida.
Tojikiston prezidenti Imomali Rahmonning singlisi, 64 yoshli Qurbonbi Rahmonova 20-iyul kuni vafot etgandi. Ayol koronavirusga chalingan va Tojikiston prezidenti ma’muriyati huzuridagi Tibbiyot markazida davolanayotgan edi.
Uni davolash uchun Germaniya, Rossiya va O‘zbekistondan tajribali mutaxassislar taklif qilingan. “Ozodi” manbasining aytishicha, ayolning o‘limidan ikki soat oldin chet ellik mutaxassislar bemorni davolash usuli noto‘g‘ri olib borilganini aytgan.
“Bu xulosadan Qurbonbi Rahmonovaning farzandlari qattiq g‘azablandi: onasining vafotidan keyin Faxriddin, Farrux va Ziyodali Safarovlar shifokorlarga va hozirgi tibbiyot-amaldorlariga hujum qildi. Ularni tinchlantirishga faqat prezidentning to‘ng‘ich o‘g‘li Rustam Imomali muvaffaq bo‘ldi ”, — dedi radio manbasi.
Sog‘liqni saqlash vaziri Jamoliddin Abdullozoda vazirlik matbuot anjumanida hamda AQShning Tojikistonga yordam sifatida yuborgan 1,5 million dozadagi Moderna vaksinasini qabul qilishda ishtirok etmagan.
Sog‘liqni saqlash vazirining o‘rinbosari Shodixon Jamshid 26-iyul kuni jurnalistlar bilan uchrashuvda vazir Abdullozodaning Tojikiston tashqarisida xizmat safarida ekanini aytgan.
Izoh (0)