31 январдан бери Гонконгнинг 64 900 га яқин аҳолиси Британиянинг чет элдаги ҳудудларига виза олиш учун ариза топширган. 47 мингдан зиёд аризачининг визалари аллақачон тасдиқланган, деб ёзади South China Morning Post.
Бу рақамлар Гонконг аҳолисининг оммавий чиқиб кетиш тенденциясини намойиш қилди.
2020 йилнинг июнь ойида Гонконгда Хитойга қарши намойишлар учун жавобгарликни кучайтириш тўғрисида миллий хавфсизлик қонуни қабул қилинди. Бунга жавобан Буюк Британия Гонконг аҳолиси учун махсус виза дастурини яратди.
Буюк Британиянинг чет элдаги ҳудудларига визалар гонконгликларга Буюк Британияда ҳар бири 5 йилдан бўлган икки муддат давомида ишлаш ва ўқиш, шунингдек, соддалаштирилган схема бўйича фуқароликка ариза топшириш имконини беради.
Британия ҳукуматининг ҳисоб-китобларига кўра, Гонконгнинг 5,4 миллион аҳолиси янги виза олиш учун ариза топшириши мумкин — бу шаҳарда яшовчи етти ярим миллион аҳолининг 70 фоиздан кўпроғи дегани.
Гонконг бир ярим аср давомида Британия мустамлакаси бўлган, лекин 1997 йилда автономликни сақлаб қолиш шарти билан Хитойга қайтарилган. Аммо сўнгги бир неча йил ичида Хитой ҳукумати Гонконгдаги демократик мухолифатни бостиришга қаратилган қатор қонунлар қабул қилди. Буюк Британия баёнотига кўра, бу Гонконгни Хитойга ўтказиш тўғрисидаги шартнома шартларини бузмоқда.
Изоҳ (0)