Тожикистон соғлиқни сақлаш ва ижтимоий ҳимоя вазири Жамолиддин Абдуллозода мамлакат президенти Имомали Раҳмоннинг жиянлари томонидан калтаклангани ҳақидаги хабарни рад этди.
Ҳукуматнинг «Жумҳурият» газетасига берган интервьюсида вазир бу миш-мишлар унинг учун кутилмаган бўлганини айтди.
«Бундай миш-мишларни тарқатганлар, мен хизмат сафарида вазирлик штаб-квартирасининг коронавирус бўйича онлайн йиғилишларида қатнашганимни пайқаши керак эди. Бу оммавий ахборот воситаларида мен ҳақимда миш-миш тарқатганларга жавоб. Онлайн учрашувларга ташриф буюрган барча тиббиёт муассасалари раҳбарлари мени кўрган», — деди вазир.
Аввалроқ Тожикистон ички ишлар вазири Рамазон Раҳимзода матбуот анжуманида «соғлиқни сақлаш ва аҳолини ижтимоий муҳофаза қилиш вазирининг калтакланиши тўғрисида милицияга ҳеч қандай шикоят ёки маълумот келиб тушмаганини» айтганди.
Тожикистон раҳбари Имомали Раҳмоннинг уч нафар жияни шифокорлар ва амалдорларни, жумладан, соғлиқни сақлаш вазирини аёвсиз калтаклагани ҳақида «Озоди» радиоси ўз манбаларига таяниб хабар берганди. Радио хабарига кўра, воқеа 20 июль куни кечқурун, Тожикистон президентининг синглиси Қурбонби Раҳмонова COVID-19 дан вафот этганидан ҳеч қанча ўтмай юз берган.
«Калтакланиш натижасида соғлиқни сақлаш вазири Жамолиддин Абдуллозоданинг жағига қаттиқ зарба берилган, президент ижро этувчи аппарати ҳузуридаги Тиббиёт маркази раҳбари Холмахмад Раҳимзода бошидан жароҳат олган. Қолган шифокорлар енгил тан жароҳатлари олган », — дейилади «Озоди» радиоси хабарида.
Тожикистон президенти Имомали Раҳмоннинг синглиси, 64 ёшли Қурбонби Раҳмонова 20 июль куни вафот этганди. Аёл коронавирусга чалинган ва Тожикистон президенти маъмурияти ҳузуридаги Тиббиёт марказида даволанаётган эди.
Уни даволаш учун Германия, Россия ва Ўзбекистондан тажрибали мутахассислар таклиф қилинган. «Озоди» манбасининг айтишича, аёлнинг ўлимидан икки соат олдин чет эллик мутахассислар беморни даволаш усули нотўғри олиб борилганини айтган.
«Бу хулосадан Қурбонби Раҳмонованинг фарзандлари қаттиқ ғазабланди: онасининг вафотидан кейин Фахриддин, Фаррух ва Зиёдали Сафаровлар шифокорларга ва ҳозирги тиббиёт-амалдорларига ҳужум қилди. Уларни тинчлантиришга фақат президентнинг тўнғич ўғли Рустам Имомали муваффақ бўлди », — деди радио манбаси.
Соғлиқни сақлаш вазири Жамолиддин Абдуллозода вазирлик матбуот анжуманида ҳамда АҚШнинг Тожикистонга ёрдам сифатида юборган 1,5 миллион дозадаги Moderna вакцинасини қабул қилишда иштирок этмаган.
Соғлиқни сақлаш вазирининг ўринбосари Шодихон Жамшид 26 июль куни журналистлар билан учрашувда вазир Абдуллозоданинг Тожикистон ташқарисида хизмат сафарида эканини айтган.
Изоҳ (0)