Қозоғистондаги ҳарбий қисмда юз берган портлашда камида 5 киши ҳалок бўлди, 90 киши жароҳатланди (видео)

Қозоғистондаги ўқ-дори омборларида 26 август куни содир бўлган портлаш оқибатида беш аскар ҳалок бўлди, жароҳатланганлар сони 90 кишига етди. Ҳарбий омборлар ҳудудида 500 тоннадан ортиқ тротил (портловчи модда) сақланарди. Ҳарбий қисмда ёнғин давом этмоқда, 1,2 мингга яқин одам эвакуация қилинди. Расмийлар ҳодиса сабаби сифатида қасддан ўт қўйиш версиясини истисно қилмаяпти.

«Омборлар Қозоғистоннинг Жамбил вилоятидаги ҳарбий қисмда жойлашган. Портлашлар оқибатларини бартараф этиш вақтида беш ҳарбий хизматчи ҳалок бўлди», — дея хабар берди Қозоғистон мудофаа вазири Нурлан Ермекбаев. Унинг айтишича, яна бир неча киши алоқага чиқмаяпти, улар қидирилмоқда.

«Воқеа сабаблари тезкор-тергов гуруҳи томонидан ўрганилмоқда. Биз турли сабабларни истисно қилмаймиз, бу хавфсизлик қоидаларини бузиш, ўз-ўзидан ёниб кетиш, кимёвий реакция бўлиши мумкин, қасддан ўт қўйиш ва қўпорувчилик ҳам истисно қилинмаяпти», — деди мудофаа вазири.

«Ўқ-дорилар омборида 500 тоннадан ортиқ тротил бор эди. Бўлакларнинг сочилиш радиуси 2 километргача етган» — деди Қозоғистон Фавқулодда вазиятлар вазирлиги расмий вакили Талгат Уали журналистларга.

Мудофаа вазирлиги маълумотларига кўра, омборларда ўқ-дориларнинг портлаши тўхтаган, бироқ ёнғин ҳали давом этмоқда. «Муҳандислик ўқ-дорилари ерусти омборида сақланади. Омборларда ерости сақлаш жойлари йўқ. Бошқа турдаги ўқ-дорилар (артиллерия, реактив, ракета, ўқотар қуроллар ўқ-дорилари) у ерда сақланмайди », — дейилади вазирлик матбуот баёнотида.

Муҳандислик ўқ-дорилари — портловчи ва пиротехник бирикмаларни ўз ичига олган муҳандислик қуроллари воситаси. Улар портловчи воситаларга, портловчи зарядларга, муҳандислик миналарига бўлинади.

«Ярадорлар сони 90 кишига етди. Касалхонага ётқизилган олти кишининг жароҳатлари оғир деб баҳоланмоқда», — дея хабар берди «РИА Новости» вилоят маъмурияти матбуот хизматига таяниб.

«Портлашлар туфайли 1,2 мингга яқин одам эвакуация қилинди. Эвакуацияга 300 нафар полиция ходимлари ва 500 нафар Миллий гвардия ҳарбийлари жалб қилинган», — дейилади Қозоғистон ИИВ хабарида.

Қозоғистонда портлаш 26 август куни содир бўлганди. Воқеа жойида ёнғин оқибатларини бартараф этиш бўйича тезкор штаб тузилган, мудофаа вазири, фавқулодда вазиятлар вазири, шунингдек, ички ишлар вазирининг ўринбосари етиб келган.

Қурол билан, шунингдек, бошқаларга хавф туғдирадиган моддалар ва нарсалар билан ишлаш қоидаларининг бузилиши бўйича жиноят иши қўзғатилган.