Qozog‘istonning Jambil viloyatida portlash sodir bo‘ldi. Mamlakat Mudofaa vazirligi bergan xabarga ko‘ra harbiy omborlardan birida yong‘in kuzatilgan, deb yozmoqda Tengrinews.
Portlash va ulkan yong‘in hodisa guvohi bo‘lgan kishilar tomonidan videotasvirga tushirilgan.
“Taraz yo‘lida harbiy omborlardan biri yonmoqda. Portlashning zarb to‘lqini mashinada ketayotgan vaqtimda ham sezildi”, — deb yozgan ijtimoiy tarmoqlarda guvohlardan biri.
“Jambil viloyatining Bayzak tumanida joylashgan harbiy qismda mahalliy vaqt bilan, taxminan, soat 19:00 da yong‘in kuzatilgan. Yong‘in oqibatida noma’lum predmetlar portlab ketgan. Olovni o‘chirishga yong‘in o‘chirish guruhlari o‘z maxsus transporti bilan jalb qilingan. Ularga Jambil viloyatidagi Favqulodda vaziyatlar departamentining yong‘inni o‘chirish bo‘linmalari ko‘mak bergan”, — deyiladi Qozog‘iston Mudofaa vazirligi bayonotida.
Xabarlarga ko‘ra, yong‘in o‘chog‘ini bartaraf etish ishlari davom etmoqda. Hodisaning kelib chiqish sabablari ham o‘rganilmoqda.
“Hodisa yuz bergan joyga mudofaa vazirining o‘rinbosari, general-leytenant Ruslan Shpekayev rahbarligidagi vazirlik komissiyasi yuborilgan”, — deya qo‘shimcha qilgan vazirlik vakili.
Sputnik xabariga ko‘ra, Qozog‘iston Mudofaa vazirligi tomonidan portlash yuz bergan hududdagi aholini evakuatsiya qilish ishlari boshlangan. Harbiy qism omboridagi o‘q-dorilar injenerlik qurollari va uzoqqa uchadigan xususiyatlarga ega emas.
2019-yil 24-iyunda Turkiston viloyatida tarqatib yuborilayotgan harbiy qism joylashgan hududda bir nechta portlashlar kuzatilgandi. Qurolli Kuchlar arsenalining birida olov chiqqan, oqibatda harbiy qism hududidagi o‘q-dorilar portlagandi. Shahar aholisi xavfsiz joyga evakuatsiya qilingan, hodisa oqibatida to‘rt kishi halok bo‘lgandi. O‘zbekiston TIV Arisdagi mazkur portlashlardan keyin halok bo‘lganlar orasida o‘zbekistonliklar yo‘qligini bildirgan.
Izoh (0)