Toshkent shahridagi do‘konlardan biriga bostirib kirib, u yerdan 1,4 million so‘m, telefon va bir blok tamaki olib chiqib ketgan shaxslarga nisbatan jinoyat ishi qo‘zg‘atildi. Bu haqda “Toshkent” telekanali orqali uzatilgan lavhada ma’lum qilindi.
Ma’lum qilinishicha, 17-avgust kuni soat 04:30 lar atrofida ikki nafar niqobli erkak poytaxtning Yunusobod tumanidagi do‘konlardan biriga o‘g‘rilikka tushgan. Bu vaqtda sotuvchilardan biri uxlayotgan, ikkinchisi ham uyqu aralash holatda bo‘lgan. Qo‘llaridagi pichoq bilan sotuvchiga tahdid qilgan shaxslar savdodan tushgan pullar va bir quti tamakini olib chiqib ketgan.
Bosqinchilar ketgach, sotuvchilar 102 raqamiga qo‘ng‘iroq qilgan.
Olib borilgan tezkor surishtiruv ishlari natijasida ushbu shaxslar davlat raqamlari yechib olingan oq rangli Spark avtomobilida voqea joyidan yashiringani aniqlangan. Surishtiruv davomida avtomobil topilgan va ikki bosqinchi ushlangan.
“Kinolarni gaplashib ketdik… Kinolarda ko‘rganimizdek, qiziqib, qo‘rqitish maqsadida kirdik. To‘g‘risini aytsam, hazil-hazil bilan chiqib ketib qoldi bu narsa”, — deydi qo‘lgan olingan gumonlanuvchilardan biri.
Holat yuzasidan Yunusobod tumani IIO FMB tergov bo‘limi tomonidan Jinoyat kodeksining 164-moddasi (bosqinchilik) 2-qismi bilan jinoyat ishi qo‘zg‘atilgan.
Avvalroq Yashnoboddagi do‘konda sotuvchiga pichoq tirab, kassadagi pullarni o‘marib ketgan to‘rt shaxsdan ikkitasi qo‘lga olingani to‘g‘risida xabar berilgandi.
Izoh (0)