Ijtimoiy tarmoqlarda fuqaro Yu.J. ukasi R.J.ga To‘rtko‘l tumani IIB xodimlari tomonidan tan jarohat yetkazilganligi sababli IIB xodimlariga chora ko‘rishni so‘ragan murojaati tarqalgandi. Qoraqalpog‘iston Respublikasi prokuraturasi ushbu IIB xodimlariga xizmat tekshiruvi tayinlangani haqida xabar bergandi. IIV matbuot xizmati voqea aslida qanday bo‘lganini “Daryo”ga ma’lum qildi.
Ma’lum bo‘lishicha, Beruniy tumanlararo sudining 23-martdagi qarori bilan javobgar R.J.dan 15 va 13 yoshli voyaga yetmagan ikki o‘g‘lini ularning onasi U.T.ning tarbiyasiga olib berish ko‘rsatilgan.
Ushbu qaror ijrosini ta’minlash maqsadida MIB Qoraqalpog‘iston boshqarmasi To‘rtko‘l tumani bo‘limi tomonidan 19-iyul kuni To‘rtko‘l tumani IIB boshlig‘iga jamoat tartibini saqlanishini ta’minlash va majburiy ijro qilishda vujudga keladigan to‘siqlarni bartaraf etishda xodim ajratish yuzasidan talabnoma yuborilgan va mazkur talabnomaga asosan 24-iyul kuni 6 nafar IIB xodimi ajratilgan.
Shu kuni soat 16:00 larda yuqoridagi IIB xodimlari MIB To‘rtko‘l tumani bo‘limi 3 nafar xodimi, voyaga yetmagan farzandlarning onasi bo‘lgan da’vogar ayol, mahalla raisi hamda xolislar ishtirokida To‘rtko‘l tumani “Tozabog‘yop” OFYda yashovchi javobgar er J.R.ning uyiga borib, uning sobiq xotiniga ikki o‘g‘lini olib berish vaqtida IIB xodimlari jamoat tartibini saqlash choralarini olib borgan.
Hodisa joyida javobgar erning ruhiy holati normal darajada bo‘lmaganligi sababli ijrochi va boshqa tadbir ishtirokchilariga to‘sqinlik qilishining oldini olish maqsadida uni ushlab turish choralari ko‘rilgan. Hodisa bo‘yicha har bir holat videoyozuvga qayd etilgan.
Shundan so‘ng javobgar R.J.ning otasi R.M. va ukasi Yu.J. 26-iyul kuni soat 10:00-11:00 lar atrofida To‘rtko‘l tumani IIB va tuman prokuraturasi ma’muriy binolari ichida shovqin ko‘tarib, jamiyatda yurish-turish qoidalarini qasddan mensimasdan, mayda bezorilik sodir qilgan.
Ushbu holatlar ham videoyozuvga olingan. Mazkur holat yuzasidan tegishli tartibda hujjatlari rasmiylashtirilib, to‘plangan hujjatlar ko‘rib chiqish uchun Jinoyat ishlari bo‘yicha To‘rtko‘l tumani sudiga yuborilgan. Jinoyat ishlari bo‘yicha To‘rtko‘l tumani sudi tomonidan huquqbuzarlar R.M. va Y.J.ga nisbatan 30-iyul kuni 15 sutka ma’muriy qamoq jazosi tayinlangan.
Bundan tashqari, 27-iyul kuni R.J.ning ukasi Yu.J. xizmat vaqtida To‘rtko‘l tumani tibbiyot birlashmasida yurgan, To‘rtko‘l tumani IIB HPB TP profilaktika katta inspektorini qasddan urib, tan jarohati yetkazgan. Mazkur holat yuzasidan hozirgi vaqtda To‘rtko‘l tumani prokuraturasi tomonidan tergovga qadar tekshiruv ishlari olib borilmoqda (voqea videoyozuvga olingan).
27-iyul kuni ham javobgar J.R.ning otasi R.M., onasi U.A. va ukasi Yu.J. To‘rtko‘l tumani hokimligi binosiga borib, hokimlik binosi ichida shovqin ko‘tarib, jamiyatda yurish-turish qoidalarini qasddan mensimasdan, mayda bezorilik harakatlarini sodir qilgan. Ushbu holatlar ham videoyozuvga olingan. Mazkur holat yuzasidan hozirgi vaqtda To‘rtko‘l tumani IIB tomonidan tekshiruv ishlari olib borilmoqda.
Izoh (0)