Ижтимоий тармоқларда фуқаро Ю.Ж. укаси Р.Ж.га Тўрткўл тумани ИИБ ходимлари томонидан тан жароҳат етказилганлиги сабабли ИИБ ходимларига чора кўришни сўраган мурожаати тарқалганди. Қорақалпоғистон Республикаси прокуратураси ушбу ИИБ ходимларига хизмат текшируви тайинлангани ҳақида хабар берганди. ИИВ матбуот хизмати воқеа аслида қандай бўлганини «Дарё»га маълум қилди.
Маълум бўлишича, Беруний туманлараро судининг 23 мартдаги қарори билан жавобгар Р.Ж.дан 15 ва 13 ёшли вояга етмаган икки ўғлини уларнинг онаси У.Т.нинг тарбиясига олиб бериш кўрсатилган.
Ушбу қарор ижросини таъминлаш мақсадида МИБ Қорақалпоғистон бошқармаси Тўрткўл тумани бўлими томонидан 19 июль куни Тўрткўл тумани ИИБ бошлиғига жамоат тартибини сақланишини таъминлаш ва мажбурий ижро қилишда вужудга келадиган тўсиқларни бартараф этишда ходим ажратиш юзасидан талабнома юборилган ва мазкур талабномага асосан 24 июль куни 6 нафар ИИБ ходими ажратилган.
Шу куни соат 16:00 ларда юқоридаги ИИБ ходимлари МИБ Тўрткўл тумани бўлими 3 нафар ходими, вояга етмаган фарзандларнинг онаси бўлган даъвогар аёл, маҳалла раиси ҳамда холислар иштирокида Тўрткўл тумани «Тозабоғёп» ОФЙда яшовчи жавобгар эр Ж.Р.нинг уйига бориб, унинг собиқ хотинига икки ўғлини олиб бериш вақтида ИИБ ходимлари жамоат тартибини сақлаш чораларини олиб борган.
Ҳодиса жойида жавобгар эрнинг руҳий ҳолати нормал даражада бўлмаганлиги сабабли ижрочи ва бошқа тадбир иштирокчиларига тўсқинлик қилишининг олдини олиш мақсадида уни ушлаб туриш чоралари кўрилган. Ҳодиса бўйича ҳар бир ҳолат видеоёзувга қайд этилган.
Шундан сўнг жавобгар Р.Ж.нинг отаси Р.М. ва укаси Ю.Ж. 26 июль куни соат 10:00-11:00 лар атрофида Тўрткўл тумани ИИБ ва туман прокуратураси маъмурий бинолари ичида шовқин кўтариб, жамиятда юриш-туриш қоидаларини қасддан менсимасдан, майда безорилик содир қилган.
Ушбу ҳолатлар ҳам видеоёзувга олинган. Мазкур ҳолат юзасидан тегишли тартибда ҳужжатлари расмийлаштирилиб, тўпланган ҳужжатлар кўриб чиқиш учун Жиноят ишлари бўйича Тўрткўл тумани судига юборилган. Жиноят ишлари бўйича Тўрткўл тумани суди томонидан ҳуқуқбузарлар Р.М. ва Й.Ж.га нисбатан 30 июль куни 15 сутка маъмурий қамоқ жазоси тайинланган.
Бундан ташқари, 27 июль куни Р.Ж.нинг укаси Ю.Ж. хизмат вақтида Тўрткўл тумани тиббиёт бирлашмасида юрган, Тўрткўл тумани ИИБ ҲПБ ТП профилактика катта инспекторини қасддан уриб, тан жароҳати етказган. Мазкур ҳолат юзасидан ҳозирги вақтда Тўрткўл тумани прокуратураси томонидан терговга қадар текширув ишлари олиб борилмоқда (воқеа видеоёзувга олинган).
27 июль куни ҳам жавобгар Ж.Р.нинг отаси Р.М., онаси У.А. ва укаси Ю.Ж. Тўрткўл тумани ҳокимлиги биносига бориб, ҳокимлик биноси ичида шовқин кўтариб, жамиятда юриш-туриш қоидаларини қасддан менсимасдан, майда безорилик ҳаракатларини содир қилган. Ушбу ҳолатлар ҳам видеоёзувга олинган. Мазкур ҳолат юзасидан ҳозирги вақтда Тўрткўл тумани ИИБ томонидан текширув ишлари олиб борилмоқда.
Изоҳ (0)