AOKAda o‘tkazilgan brifingda SSV huzuridagi Koronavirusga qarshi kurashish shtabi a’zosi Sevara Ubaydullayeva vaksina olmagan O‘zbekiston fuqarolari Rossiyaga kiritilishi borasida berilgan savolga javob berdi.
– Turmush o‘rtog‘im koronavirusga qarshi vaksina olmagan. U 25-avgust kuni Rossiyaga uchib ketishi kerak. Turmush o‘rtog‘im aeroportda biror to‘siq yoki muammoga duch kelmaydimi?
“Bugungi kunda COVID-19 infeksiyasidan himoyalanish uchun har bir mamlakat o‘z tartib-qoidalarini ishlab chiqmoqda. Bunday tartib yurtimizda ham o‘rnatilgan bo‘lib, bu — xalqimizni koronavirusdan himoya qilishning asosiy ko‘rsatkichlaridan biri sanaladi.
Shu ma’noda agar turmush o‘rtog‘ingiz hozirgacha vaksina olib ulgurmagan bo‘lsa, u ayni paytda Rossiyaning O‘zbekiston fuqarolariga qo‘yilgan talablari asosida ushbu davlatga kiritiladi.
Ya’ni bugungi kunda mazkur mamlakatga kiruvchi O‘zbekiston fuqarolari COVID-19 ga qarshi to‘liq emlangan yoki kasallanib, antitanalar hosil qilgan bo‘lsa, PZR-test topshirishi shart bo‘lmaydi va ular 2021-yil 11-iyunda Rossiyada o‘rnatilgan tartibga ko‘ra, vaksina olganlik sertifikati yoki kasallanib chiqqandan keyingi ma’lumotnoma bilan ushbu davlatga kira oladilar.
Vaksina olmagan yoki kasallanib, antitanalar hosil qilmagan fuqarolar esa 5 kun davomida 2 marta PZR-test natijasi manfiy chiqqan taqdirdagina Rossiyaga kiritiladi.
Bundan tashqari, Rossiyada o‘rnatilgan tartibga ko‘ra, 2021-yil 1-sentabrdan O‘zbekiston fuqarolari “Puteshestvuyu bez COVID-19” nomli mobil dasturdan ro‘yxatdan o‘tishlari va ushbu mamlakatga kirishdan 3 kundan ko‘p bo‘lmagan muddatda topshirilgan PZR-test natijasi oldindan kiritilishi va ushbu mobil dastur orqali bu holat tahlilidan so‘ng mazkur davlatga kirishga ruxsat etilishi yoki yo‘qligi belgilandi”, – dedi Sevara Ubaydullayeva.
Izoh (0)