Qashqadaryo hokimi Zoir Mirzayev Qarshi shahrida majburiy mehnatga yo‘l qo‘ygan maktab direktorini ishdan olish haqida topshiriq berdi, deya xabar qildi “Daryo” muxbiri.
Ta’kidlanishicha, viloyat rahbari bu haqda dushanba kuni bo‘lib o‘tgan apparat yig‘ilishida ma’lum qilgan.
“Men majburiy mehnatni taqiqlab, tanqid qilib turibman. Ertasi kuni maktab direktori majburiy mehnatga yo‘l qo‘ygan. Bu nimasi?”, — degan viloyat rahbari xalq ta’limi boshqarmasi boshlig‘i To‘lqin Karimovga yuzlanar ekan.
Viloyat hokimi xalq ta’limi boshqarmasi boshlig‘iga majburiy mehnatga yo‘l qo‘ygan maktab direktori ishdan olinmasa, shahar xalq ta’limi bo‘limi rahbarini ham ishdan olishini bildirgan.
“Bugunoq maktab direktori ishdan olinsin, agar ishdan ololmasanglar menga olib keling. Men ham maktab direktorini, ham shahar xalq ta’limi bo‘limi rahbarini belgilangan tartibga bo‘ysunmagani uchun ishdan olaman”, — dedi Zoir Mirzayev.
Eslatib o‘tamiz, viloyat xalq ta’limi boshqarmasi mas’ullari majburiy mehnatga yo‘l qo‘yilgani xabar berilgan Qarshi shahridagi 31-umumiy o‘rta ta’lim maktabidagi holatni o‘rganib chiqib, direktorga Mehnat kodeksining 181-moddasiga asosan hayfsan intizomiy jazo chorasini qo‘llash bilan cheklangandi. Undan avvalroq esa viloyatning Qarshi tumanidagi 6-maktabda ham majburiy mehnatga yo‘l qo‘yilgani, majburiy mehnatga yo‘l qo‘yib, ortida tuman hokimi va tuman xalq ta’limi bo‘limi rahbari turganini aytgan maktab direktoriga esa haligacha chora ko‘rilmagani xabar qilingandi.
Izoh (0)