АОКАда ўтказилган брифингда ССВ ҳузуридаги Коронавирусга қарши курашиш штаби аъзоси Севара Убайдуллаева вакцина олмаган Ўзбекистон фуқаролари Россияга киритилиши борасида берилган саволга жавоб берди.
– Турмуш ўртоғим коронавирусга қарши вакцина олмаган. У 25 август куни Россияга учиб кетиши керак. Турмуш ўртоғим аэропортда бирор тўсиқ ёки муаммога дуч келмайдими?
«Бугунги кунда COVID-19 инфекциясидан ҳимояланиш учун ҳар бир мамлакат ўз тартиб-қоидаларини ишлаб чиқмоқда. Бундай тартиб юртимизда ҳам ўрнатилган бўлиб, бу — халқимизни коронавирусдан ҳимоя қилишнинг асосий кўрсаткичларидан бири саналади.
Шу маънода агар турмуш ўртоғингиз ҳозиргача вакцина олиб улгурмаган бўлса, у айни пайтда Россиянинг Ўзбекистон фуқароларига қўйилган талаблари асосида ушбу давлатга киритилади.
Яъни бугунги кунда мазкур мамлакатга кирувчи Ўзбекистон фуқаролари COVID-19 га қарши тўлиқ эмланган ёки касалланиб, антитаналар ҳосил қилган бўлса, ПЗР-тест топшириши шарт бўлмайди ва улар 2021 йил 11 июнда Россияда ўрнатилган тартибга кўра, вакцина олганлик сертификати ёки касалланиб чиққандан кейинги маълумотнома билан ушбу давлатга кира оладилар.
Вакцина олмаган ёки касалланиб, антитаналар ҳосил қилмаган фуқаролар эса 5 кун давомида 2 марта ПЗР-тест натижаси манфий чиққан тақдирдагина Россияга киритилади.
Бундан ташқари, Россияда ўрнатилган тартибга кўра, 2021 йил 1 сентябрдан Ўзбекистон фуқаролари «Путешествую без COVID-19» номли мобил дастурдан рўйхатдан ўтишлари ва ушбу мамлакатга киришдан 3 кундан кўп бўлмаган муддатда топширилган ПЗР-тест натижаси олдиндан киритилиши ва ушбу мобил дастур орқали бу ҳолат таҳлилидан сўнг мазкур давлатга киришга рухсат этилиши ёки йўқлиги белгиланди», – деди Севара Убайдуллаева.
Изоҳ (0)