Boliviya sobiq ayol prezidenti Janin Anyes qamoqxonada o‘z joniga qasd qilishga urindi

Davlat to‘ntarishi haqidagi ish bo‘yicha hibsga olingan Boliviyaning sobiq ayol prezidenti Janin Anyes qamoqxonada o‘z joniga qasd qilishga urindi. Bu haqda Reuters uning advokatlariga tayanib xabar berdi.

Anyesning himoyachilari so‘zlariga ko‘ra, u tanasining bir nechta qismiga kesib jarohat yetkazgan. Ushbu hodisani ular “yordam haqidagi hayqiriq” deb atadi.

Mamlakat ichki ishlar vaziri Karlos del Kastilyo Anyes o‘ziga zarar yetkazishga uringanini tasdiqladi va hozir uning hayotiga hech narsa xavf solmayotgani, unga barcha zarur tibbiy yordam ko‘rsatilayotganini qo‘shib qo‘ydi.

Milliy politsiya Jinoyatchilikka qarshi kurash maxsus bo‘linmasi rahbari Duglas Azkuiano, o‘z navbatida, Anyes bilan bo‘lgan voqea o‘z joniga qasd qilishga urinish deb baholanishi mumkinligini aytdi.

Janin Anyes Boliviya senatida ikkinchi vitse-spiker va muxolifat yetakchisi bo‘lgan. 2019-yil noyabrida, Boliviyada siyosiy inqiroz yuz berganida, 13 yil davomida mamlakat rahbari lavozimini egallab kelgan Evo Moralesni iste’foga yuborgan Anyes o‘zini yangi saylovlarga qadar prezident vazifasini bajaruvchi deb e’lon qildi, 2020-yil oktabrida mamlakatda yangi saylovlar bo‘lib o‘tdi, uning yakunlariga ko‘ra, Moralesning maslakdoshi Luis Arse prezident bo‘ldi.

2021-yil martida Anyes va uning ma’muriyatidagi bir nechta yuqori mansabli amaldorlar davlat to‘ntarishini uyushtirganlik va unda qatnashganlik ayblovi bilan hibsga olindi. Shuningdek, Anyes Boliviyada norozilik namoyishlari chog‘ida 20 kishining o‘limiga aloqadorlikda ham ayblanishi mumkin.

Anyes ayblovlarni rad etib, siyosiy ta’qib qurboniga aylanganini aytmoqda. Sobiq prezidentning advokatlari uning sog‘lig‘i tufayli hibsdan ozod qilinishiga erishishga urindi, ammo ularning so‘rovi rad etildi.