AQShning Nyu-York shtati gubernatori “Genri” dovuli yaqinlashib kelayotgani tufayli favqulodda holat rejimini e’lon qildi. Bu haqda u o‘z Twitter’ida ma’lum qildi.
“‘Genri’ dovuli tufayli favqulodda holat e’lon qildim. Milliy gvardiyaning 500 harbiy xizmatchisi safarbar qilindi, shtat resurslari bo‘ronga nisbatan choralar ko‘rish uchun tayyorlab qo‘yildi”, — deb yozdi Endryu Kuomo.
Uning so‘zlariga ko‘ra, “Genri” birinchi toifali dovullar qatoriga kiradi, bu uning ehtimoliy tezligi soatiga 80 mil (128 km) ekanini bildiradi. Noqulay ob-havo sababli hukumat Ozodlik haykalini tashriflar uchun yopib qo‘ydi.
AQSh Dovullarni kuzatish milliy markazi ma’lum qilishicha, “Genri” shimoli-sharqqa qarab harakatlanmoqda. Shu munosabat bilan bo‘ron va kuchli jala ushbu hududda yakshanba kuni (22-avgust) ertalabdan kutilmoqda.
ABC News qayd etishicha, Nyu-Yorkda va Konnektikutda temiryo‘l qatnovi va metropoliten faoliyati to‘xtatiladi. Bundan tashqari, aviaqatnovlar ham to‘xtatilishi mumkin. Agentlik ma’lumotlariga ko‘ra, bo‘ron va tropik po‘rtana haqidagi ogohlantirishlar beshta shtatdagi 55 milliondan ortiq odamga yuborilgan.
Izoh (0)