Messining “Barselona”dan ketishi Aguero uchun baxtsizlik. Argentinalik hujumchilarning do‘stligi tarixi

Iyun oyining boshida “Barselona” Serxio Aguero transferini e’lon qilgandi. O‘shanda ko‘plab muxlislar qalin do‘st bo‘lgan Serxio va Lionel Messining birgalikda o‘ynashidan xursand bo‘lgani bor gap. Messining jamoadan ketishi e’lon qilingandan so‘ng esa ko‘pchilik klub afsonasini yo‘qotganidan ranjigan bo‘lsa, boshqalar do‘stlar dueti boshlanmasidan avval muvaffaqiyatsizlikka uchragani haqida hazillar qila boshladi.

Ularning do‘stligi haqidagi hikoya 2005-yilda boshlangan — o‘shanda ular birgalikda terma jamoa yig‘inida uchrashgan va Aguero Messini tanimagan. Serxio Sky Sports nashriga ushbu voqeani quyidagicha aytib beradi: “Biz terma jamoalar bilan yig‘inda edik: men U-16, u esa U-17 terma jamoasida edi. U-20 Janubiy Amerika chempionatiga tayyorgarlik ko‘rilayotgandi, ikki yosh toifasi birgalikda mashg‘ulot o‘tkazayotgandi. Esimda, bir yigit doimiy ravishda oramizda yugurib yurardi, uni televizorda ko‘rgandim, chunki u “Barselona”da o‘ynardi.

Bir kuni barchamiz stol atrofida o‘tirgandik: men, Leo, Esekiel Garay va Mauro Formika. Garay Leodan krossovkalar haqida so‘radi, u esa shunday javob berdi: ‘AQShda sotib olganman’. Men esa o‘ylab qoldim: ‘Nima, u Amerikada o‘ynaydimi?’ Keyin sekingina undan so‘radim: ‘Yana bir bor ayt-chi, isming nima?’. ‘Leo’. ‘Yo‘q. Isming nima?’ U Lionel dedi va kulib yubordi. Men shu bilan kifoyalanmasdan undan familiyasini ham so‘radim.

Sheriklarim menga qarab, ajablanib so‘rashdi: ‘Uning kimligini bilmaysanmi?’ Ular ustimdan kulayotganida, uni esladim. Bu xuddi o‘sha bola edi! Shu tariqa biz do‘st tutindik. Shundan keyin biz doimo birga mashg‘ulot o‘tkazdik, lekin o‘sha voqeani unuta olmadim. Ko‘pchilik unga nisbatan boshqacha munosabatda bo‘lardi”.

Qizig‘i, shu paytgacha ularning har ikkalasi bir-birini televizorda ko‘rib kelgan, lekin uchrashgan vaqtida buni eslay olmagan. Aguero “Barselona” o‘ynaydigan bola haqida nimadir eshitgandi, Messi esa Serxioning 15 yoshida “Independyente”dagi (Argentinaning eng mashhur klublaridan biri) debyutini kuzatgan. O‘sha vaqtda sharhlovchilar bu kunni tarixiy sana deb atagan, bo‘lajak yulduz esa ular kim haqida gapirayotganini tushunmagan ham, ismiga e’tibor qaratmagan. Ammo uni o‘n besh yoshli bolaning asosiy tarkibda debyut qilayotgani hayron qoldirgandi.

Yigitchalarning do‘stligi Niderlandiyada bo‘lib o‘tadigan U-20 Jahon chempionatida mustahkamlanadi, ular bir xonaga joylashtiriladi. Boisi murabbiy Aguero uchun Messi bilan birga yashash va uning Yevropa haqidagi hikoyalarini tinglash foydali bo‘ladi deb o‘ylagan. O‘shandan beri ular terma jamoa yig‘inlarida doimo bitta xonaga joylashadi va samolyotda ham yonma-yon o‘rindiqlarda o‘tiradi. Agar ulardan biri terma jamoaga chaqirilmasa, uning yonidagi joy har doim bo‘sh turadi.

2005-yilgi Jahon chempionatida bitta xonada yashash futbolchilarni bir-biriga yaqinlashtirgan yagona narsa emas. Aguero terma jamoada bo‘lganida, uning do‘sti, darvozabon Emiliano Molina avtohalokatga uchraydi: avtomobil yuk mashinasi ostiga kirib ketadi, shifokorlar uning hayotini qutqarib qolish uchun kurashadi (11 marta operatsiya qilinadi), lekin buning imkoni bo‘lmaydi. Serxio do‘sti haqidagi xabarlarni kuzatib o‘tiradi, lekin Molina vafot etgan kuni mehmonxona xodimlari futbolchi qattiq tushkunlikdan sog‘lig‘iga zarar yetmasligi uchun internetni uzib qo‘yadi. Messi fojia haqida bilgach, xonadoshiga do‘sti endi yo‘qligini aytadi. Leo Serxioga dalda berib, qo‘lidan kelganicha uni qo‘llab-quvvatlaydi. Shundan keyin ularning do‘stligi ancha mustahkamlanadi.

Ularning do‘stligi shu darajadaki, Messi terma jamoaga kelmagan vaqtda 10-raqam Agueroniki bo‘ladi. Leo Serxioning o‘g‘lining cho‘qintirgan otasi hisoblanadi.

Messining ketishi Aguero uchun tom ma’noda baxtsizlikdir. Kun “Barselona”ga aynan do‘sti bilan bir jamoada o‘ynash uchun kelgandi. Ularning hech biri Leoning shartnomasi bilan bog‘liq voqealar bunday rivoj olishini kutmagan edi.